“Une zailetan, taldea gehiago elkartzen da”

Iñaki Williamsek komunikabideen galderei erantzun die gaur goizean Lezaman. Ligako 7. jardunaldiko Osasunaren aurkako partidaren prestaketan murgilduta, aurrelari zuri-gorria pozik azaldu da Levanteren aurkako azken partidan taldeak egindako lanarekin, garaipen garrantzitsua valentziarren aurka lortu eta gero: “Pozik nago sartutako golarekin taldea laguntzeagatik. Hainbat porroten ondoren, oso berezia da San Mamesen berriro garaipena lortzea. Bagenekien aurrera aterako genuela, taldea une zailetan gehiago elkartzen delako. Hori da Athleticek daukana, igandean denok batera ari garela ikusi zela uste dut”.

Bere maila hobetzeko egunero ahalik eta gehien lan eginez, Williamsek modu berezian biziko du Osasunaren aurkako partida, arlo pertsonalean duen garrantziagatik: “Sadar berezia da niretzat, txiki-txikitatik partidak ikustera joan naiz askotan. Ilusio handia dut han jokatzeko. Garrantzitsua da hiru puntuak lortzea eta zaleei garaipen bat ematea. Partida lehiatua izango da ziur, baina pasa den igandean bezala jokatzen badugu, bertan irabaz dezakegu”.

Athletic sendo iritsiko da partidara azken garaipenaren ostean, eta aurrelari zuri-gorriak horrela sentitzen du: “Ziur aurten aurrekoek baino gol gehiago sartuko ditudala. Ilusio handiko urtea da guztiontzat. Bi txapelketa irabazteko aukera dugu, eta elkarrekin egon behar dugu. Arlo pertsonalean, entrenatzea eta taldeari golekin laguntzea geratzen zait. Horretan gaude”.