“Dena eman behar dugu, Osasuna oso lehiakorra baita”

Gaizka Garitanok telematikoki erantzun zien komunikabideen galderei Lezamako prentsa aretotik, Osasunaren aurkako partidaren atarian. Sadarren, Ligako 7. jardunaldian (lar. 18:30etan), jokatuko den partidari buruz, derioko entrenatzaileak aurkariaren lehiakortasuna eta antolakuntza azpimarratu ditu.

Bolada txar baten ondoren, Athleticek Levanteri irabazi zion iragan jardunaldian San Mamesen, baina deriotarraren hitzetan, ez dira taldearen planak aldatu: “Berdin lan egiten dugu. Irabazi ala ez, ez da beste modu batera lan egiten. % 100ean egon behar dugu alderdi guztietan: fisikoa, mentala, motibazioan… Biharko partidan kontzentratuta gaude. Partida ona egiten saiatuko gara. Garaipena buruan dugu beti”.

Aurkariari dagokionez, Garitanok biharko partidaren konplexutasunaz ohartarazi du: “Denbora daramate gauzak ondo egiten. Aurreko denboraldian Osasuna bikain aritu zen eta aurten ere oso ondo hasi da: Celtari ondo irabazi zioten eta partida bikaina jokatu zuten Ipuruan. Oso talde lehiakorra eta antolatua da: intentsitate handia jartzen dute presioan eta lehian, joko zuzenaren aukera dute (Enric) Gallegorekin, goitik ondo doazen erdiko atzelariak dituzte. Zerbaitegatik daude dauden lekuan”.

Talde zuri-gorriak hobera egin du asteak aurrera joan ahala: “Jokalari askok, gaixotasunagatik edo lesioagatik, ezin izan dute gurekin egon denboraldi-aurrean. Orain erritmo hartu dute. Jokalari horiek hobeto daude. Iritsi berri diren jokalarien bertuteekin ere geratu behar dugu”.