Emakumezkoen taldeko lesionatuak, prest
Emakumezkoen taldeko lesionatuak, prest
Angel Villacampak erabilgarri izango ditu Paternarako min hartuta zeuden sei jokalari
Joan den asteburuan Primera Iberdrolan izandako etenaldiaren ostean, Athleticek larunbat honetan berrekingo dio txapelketari (16:00etan, Antonio Puchades zelain) Valencia Féminas FC taldearen aurka. Angel Villacampak erabilgarri izango ditu azken asteetan erizaindegian izan dituen ia jokalari guztiak. Hauek berreskuratu ditu: Garazi Murua, Yulema Corres, Marta Unzué, Erika Vazquez, Andrea de la Nava eta Lucia Garcia. Sei lehoiak gainerako taldekideekin entrenatzen ari dira aste honetan eta Valentziara joateko deialdian sartzeko prest daude.
Ligako estreinaldi posibleak
Garazik eta Yulemak min hartu zuten denboraldi-aurrean eta, beraz, denboraldi honetako lehen minutuez goza dezakete Paternan. Kapitainaren kasuan lunbalgia batek, eta aurrelariaren kasuan, soleoan izandako lesio batek eragotzi dio garaiz iristea denboraldiaren hasieran. Gainera, Erika Vazquezek Las Gaunaseko Erreginaren Kopako finalerdian baino ezin izan zuen parte hartu eta oraindik ez du ligan minuturik jokatu. Zalantzarik gabe, asteburuko geldialdia ondo etorri zaio talde honi, eta ligako hasiera onari eusten saiatuko da.
Bestalde, Ane Azkonak bajan jarraitzen du. Nafarroakoa errefortzu bikaina izango da aurrealde zuri-gorrian, baina lanera berregokitzeko epeak bete behar ditu lehen.