Azkarrenak aulkitik
Azkarrenak aulkitik
Oihan Sancetek zelaira sartu eta hurrengo minutuan sartu zuen gola Sevillaren aurka. Azken hamarkadan Llorentek, Ibaik, Guillermok, Kodrok eta Adurizek bakarrik lortu dute hori
Athletic Clubek bigarren zatiko aldaketekin irauli zuen joan den larunbatean Sevilla FC taldearen aurkako neurketa San Mamesen. Markagailuan 0-1ekoa zegoela, Gaizka Garitanok azken ordu laurdenean sartutako bi ordezkapenekin irauli zuen, Muniainek eta Sancetek gola lortu baitzuten: 76. minutuan lehena eta 86. bestea.
Bereziki deigarria izan zen Sanceten sarrera, markagailua irauli zuen gola lortzeaz gain, zelaian sartu eta 47 segundora lortu baitzuen. Iñaki Williamsen erdiraketa on bat aprobetxatu eta sare barrura bidali zuen baloia bere lehen jokaldian.
Sancetek Sevillaren aurka erabilitako ‘modus operandi’ a beste bost aldiz errepikatu da azken 10 urteetan Ligako partidetan. Hau da, sei lehoik lortu dute gola zelaian sartu eta hurrengo minutuan. Hurrengo bideoan Llorente, Ibai, Guillermo, Kodro, Aduriz eta Sanceten golak jaso ditugu, azken hamarkadako azkarrenak. Gainera, sei kasu hauetan Athleticek ez du inoiz galdu, lau garaipen eta bi berdinketa lortuz.
Fernando Llorentek ireki zuen zerrenda Cornellan, 2012-13 denboraldian Espanyolen aurka. 69.ean zelairatu zen Isma Lopezen ordez eta 70.ean igo zen bere gola markagailura.
Hurrengo denboraldian, Ibai Gomez sartu berriak bi ukitu behar izan zituen baloiarekin Diego Lopezen atea gainditzeko hurrengo denboraldian San Mamesen. Athletic 0 eta 1 galtzen ari zen Real Madrilen aurka 73. minutuan. Ibai sartu berriak hartu zuen zelai erdiko falta jaurtitzeko ardura, partidako bere lehen jokaldian. Jaurtiketa horren aldaratzean fusilatu zuen Ibaik madrildarren atea, 74. minutuan.
Hiru jardunaldi geroago Guillermok sartu zuen gola bere partidako lehen jokaldian, Benito Villamarinen. Aurrelaria 79. minutuan zelairatu zen eta 80. minutuan gola egin zuen buruz.
Kodrok sei jokalariko zerrenda bitxi honekin bat egin zuen 2018-19 denboraldian, Atletico Madrilen aurka San Mamesen (2-0). Raul Garciaren lekua hartu zuen 85.ean eta minutu berean sartu zuen lehoien bigarren gola, Garitanoren mutilen kontraeraso on baten ostean.
Adurizek 2019-20ko Ligako lehen jardunaldian Athleticekin egindako azken gol mitikoa ere multzo honetan dago. Barçaren aurkako bere guraizea San Mameseko berdegunean sartu eta minutu batera gertatu zen. 87.ean Williams ordezkatu zuen eta 88.ean igo zen bere gola markagailura.