“Gola sartzen duten lehenak izaten saiatuko gara”

Gaizka Garitanok telematikoki erantzun ditu hedabideen galderak bihar (18:30) Real Valladoliden aurka Jose Zorrilla estadioan jokatuko den Ligako 9. jardunaldiko partidaren atarian.

Derioko entrenatzaileak partidaren zailtasunaz ohartarazi du, aurkariak, Ligako azken sailkatuak, bizi duen une zaila dela eta: “Kontuz ibili behar dugu, partida hil ala bizikoa baita haientzat. Bihar asko dute jokoan, baina guk ere horrela hartu behar dugu”. Garitanok aurkariaren erasoko ahalmena ere azpimarratu du: “Mugikortasun handiko jokalariak dituzte zelai erdian gora. Bandako jendea dute eta erdiraketa onak jartzen dituzte, Hervias edo Nacho kasu, eta Oscar Plano, Orellana eta Toni Villarekin ere eraso dezakete”.

Talde zuri-gorriak “gola buruan” duela gogoratu du zuri-gorrien entrenatzaileak, eta etxetik kanpo gola sartzea jarri du lehentasun gisa, ahal dela markagailua zabalduz: “Azken bi partidetan ez dugu etxetik kanpo sartu, horretan hobetu behar dugu. Beti da garrantzitsua lehenengo sartzea, eta horrelako norgehiagoketan, are gehiago. Iaz lehenengo sartu genuen gola eta horrek lasaitasuna eman zigun. Markagailuan aurrea hartzeak lagundu egiten dizu eta beste era batera jokarazten duzu”.

Garitanok momentu onean ikusten du taldea: “Gu beti gaude animo handiarekin, baina, logikoa denez, irabazten duzunean gauzak alde dituzu. Taldea oso motibatuta dago entrenamendu bakoitzean eta gogotsu ekingo dio biharko artidari “.