Adurizek Thinking, Letrak eta Futbola jaialdia ireki du

Thinking, Letrak eta Futbola izeneko jaialdia BBK Sala aretoan hasi da gaur arratsaldean, Aritz Aduriz protagonista duen dokumental bereziarekin. Muntaia berezia The Mediapro Studiok sortutako Six Dreams dokumentalean oinarrituta dago. Athletic Clubeko lehendakaria, Aitor Elizegi, arduratu da hasierako hitzaldia emateaz. Jende kopurua mugatua izan da eta COVID-19aren aurkako osasun-protokoloan jasotako neurri guztiak bete dira. Erakundeetako hainbat ordezkari bertaratu dira, hala nola Bilboko alkatea, Juan Mari Aburto; Fundazioko Zuzendari Nagusia, Jon Vázquez Eguskiza; BBK-ko Kultura-Arduraduna, Koldo Bilbao, Itxaso Erroteta eta Jone Goirizelaia zinegotziak, baita Zuzendaritza batzordeko ordezkariak ere: Itziar Villamandos, Tomás Ondarra, Goyo Arbizu eta Iker Goñi.

Aritz Adurizen azken urteari buruzko dokumental bereziaren ostean, protagonista solasean aritu da gainerako gonbidatuekin: Justin Webster, muntaketa hau oinarri izan duen Six Dreams seriearen zuzendaria; Jordi Call, produktorea; Galder Reguera, Fundazioko Proiektu Arduraduna, eta Jon Maia bertsolaria. Azken horrek, amaieran, bertso hunkigarri bat eskaini dio Adurizi.

Aurretik, jardunaldiaren hasieran, Aitor Elizegik Errekonozimenduaren Saria eman dio Fede Merino kazetariari, talde zuri-gorriaren golak ospatzeko “bacalao bacalao” oihu ospetsuaren sortzaile izateagatik.

Bigarren egunean, This is Football, John Carlin eta Ander Izagirre
Jaialdiak aurrera jarraituko du asteartean, John Carlinen inguruko saio batekin. Clint Eastwoodek zinemara eraman zuen bere “The human factor” liburua (2006), Invictus izenarekin. Morgan Freeman izan zuen aktore nagusia, Nelson Mandelaren pertsonaian. Egun honetan bi ekitaldi izango dira, biak gai berekoak, baina independenteak. Beraz, bakoitzerako sarrera desberdinak hartu behar dira.

Lehenengo, 17:00etan, San Mameseko Eraztun Nagusiko Ipar aretoan (sarbidea E puntutik, 12. atearen ondoan) Carlinek berak zuzendutako “This is Football” dokumentala emango da. Behin emanaldia bukatuta, bertaratutakoek aretotik irten beharko dute, bigarren ekitaldirako garbiketa egin ahal izateko.

Ondoren, 19:00etatik aurrera eta Ipar aretoan bertan, John Carlin Ander Izagirre idazlearekin arituko da solasean. Bigarren horrek Euskadi Literatur Saria irabazi du “Potosí” liburuarekin.

Informazio gehiago lortu eta sarrerak eskuratzeko, kontsultatu hemen: https://thinkingletrasyfutbol.com