Filialen arteko neurketa Lezaman

Bilbao Athleticek Deportivo Alaves Bren aurka jokatuko du bihar Lezaman, ligako hirugarren garaipena jarraian lortzeko asmoz. Partida zuzenean jarraitu ahal izango da Athletic Clubeko Youtubeko kanalaren bitartez, 15: 45etik aurrera.

Txapelketa Arenasen aurka berdinduta eta Racingen aurka galduta hasi ondoren, Joseba Etxeberriaren lehoikumeek landutako garaipena lortu zuten La Floridan Potugaleteren aurka eta Lezamako lehen garaipena lortu zuten iragan asteburuan Amorebietaren aurka.

Entrenatzaile zuri-gorria pozik agertu da bere jokalariek azken jardunaldietan erakutsitako irudiarekin: “Pozik gaude. Bi garaipen jarraian lortu ditugu ligan, eta hori maila honetan eta multzo honetan zaila da. Jokalarien maila altua da, berriak ondo moldatzen ari dira eta hori oso garrantzitsua da. Taldea geroz eta hobeto dago, guk bilatzen dugunera hurbiltzen ari da eta, jakina, garaipenek lagundu egiten dute. Hala ere, badakigu maila honetako partida bakoitza borroka gogorra izango dela”.

Hurrengo “borroka” filialen arteko neurketa izango da. Bilbao Athleticek eta Deportivo Alaves Bk elkarren aurka jokatuko dute bihar Lezaman Bigarren B Mailako 5. jardunaldiko partidan. Babazorroak sei punturekin iritsiko dira Lezamara, lehoikumeak baino bat gutxiagorekin, orain arteko hiru partidetan bi garaipen eta porrot bat lortu ostean. Aurreko denboraldian, zuri-gorrien garaipenarekin amaitu zen bien arteko norgehiagoka, 1 eta 0.