Garitano: “Irabaztea besterik ez dugu buruan”

Gaizka Garitanok, San Mamesen Real Betisen aurka jokatzeko 24 ordu eskasera, erantzun ditu komunikabideek egindako galderak. Athleticeko entrenatzaileak partidaren garrantziaz ohartarazi du, baina ez du uste “oraindik finala denik, Ligako hamargarren jardunaldia delako”.

Deriokoal adierazi duenez, talde andaluziarra “oso ona da teknikoki. Baloia ondo mugitzen dute, eta horrek presioan adi egotera behartuko digu. Defentsan sufritzen ari dira eta hori aprobetxatu behar dugu”. Talde andaluziarrak 12 puntu lortu ditu partida bat gehiago jokatuta: “Garaipena dugu buruan. Betisen puntu berdinekin jarri nahi dugu, guk baino garaipen bat gehiago lortu baitute. Talde asko berdinduta daude inguru honetan”.

Derioko entrenatzaileak Katedralean indartsu jokatzearen garrantzia azpimarratu du: “Etxeko azken bi partidak irabazi ditugu, Levanteren aurka partida ona eta Sevillaren aurka bigarren zati bikaina eginez. Puntuak atera behar ditugu San Mamesen, nahiz eta gure jendearen laguntzarik ez izan”.

Halaber, bi areatan asmatzearen garrantzia azpimarratu du: “ordena eta jokoaren egitura lantzea da errazena, oreka emateko, baina zaila da ateetan egin beharrekoa zuzentzea. Zortzi partidatan, aurkariek izan dituzten ia aukera guztiak sartu dizkigute. Gehiago asmatu eta eraginkortasun handiagoa izan behar dugu, eta azken pasean zehatzagoak izan behar gara gol aukera argiagoak sortzeko”.