“Jarraian lortutako bigarren garaipenaren bila goaz”

Gaizka Garitanok agerraldia egin du Lezamako prentsa aretoan, Getafe-Athletic partidaren aurreko azken entrenamendua egin aurretik (bihar, Coliseum Alfonso Perez, 16:15ean).

Entrenatzaile zuri-gorriak Madrilen hiru puntu batzearen garrantzia azpimarratu du: “Bat irabazi eta hurrengoa galtzeko dinamika batetik gatoz. Kanpoan berriro irabazi behar dugu eta bi garaipen jarraian bideratu. Hori da benetan garaipena ona egiten duena, bi segidan batzea. Talde guztiek bilatzen duten formula da, baina zaila da Lehen Mailan hori lortzea”.

Garitanok badaki biharko partidaren planteamenduak ez duela “zerikusirik” joan den asteleheneko Betisekin: “Getafe oso talde gogorra eta lehiakorra da, Ligako zailenetakoa. Oso denboraldi onak egiten ditu eta gauzak zailtzen dizkio edozein talderi. Guk argi daukagu zein izango den gure rola bihar, ondo landu dugu eta bigarren garaipenaren bila goaz”.

Athletic zortzigarren postuan sailkatuta, Derioko entrenatzaileak badaki zein estu dagoen sailkapena: “Beti izaten da horrela denboraldiaren hasieran. Berdintasuna da nagusi, eta garaipenak edo porrotak goian jartzen zaituzte gaur eta hurrengo jardunaldian behean. Guk ez diogu taulari begiratzen, egunerokoari begiratzen diogu, Lezamako lanari, taldea egiten ari den lanean benetan konfiantza dugulako, eta ziur emaitza positiboak ekarriko dituela”.