undefined

Animazio Harmaila Proiektuaren Aurrerapena

Animazio Harmaila Proiektuaren Aurrerapena

Proiektua azaltzen duen bideoa dakar, eta bazkideei abenduaren 27ko batzarrean azalduko zaie

Athletic Clubek Animazio Harmaila Proiektuaren aurkezpenaren aurrerapena egin du, azalpen-bideo batekin. Proiektua abenduaren 27ko Batzar Nagusian jarriko da ikusgai, oso-osorik. Gai-Zerrendako hirugarren puntua izango da eta konpromisarioen artean bozkatuko da. Konpromisarioek gaur hasi eta hilaren 17an eta 20an izango diren aurretiazko bileretan (azken hau, telematikoki) jakingo dute zehatz-mehatz planteamendu osoa.

Harmaila berriak San Mameseko animazioa indartzea du helburu, gaur egun dauden zonaldeak kontzentratuz -gehienbat athleticzalerik gazteenek bultzatutakoak- eta ekimenarekin bat egin nahi duten beste eserleku batzuetako ikusleak bilduz.

Proiektuaren ideia nagusia egungo Ipar Beheko tribuna bi gune independentetan banatzea da: bata, 11 ilarakoa (gaur egungo 15-25 ilarak), eserita; eta Animazio Harmaila berria, egungo tribunaren lehen 14 ilarekin, zutik (‘safe standing’).

Kokapen horrekin, segurtasunagatik eta sarbideak bereiziz, Animazio Harmaila berria bisitarientzako gunearen aurrean jarriko da. Azken honek Ekialdeko Tribunaren eta Hegoaldeko Goi-tribunaren arteko elkargunean jarraituko du.

Bi eremu independente

Planteamenduak Iparraldeko Beheko Tribuna bi mailatan antolatzen du: behekoa, animazio harmailarako, eta goikoa, egungo osaketari eusten diona, bien eta korridorearen arteko banaketa fisikoa sortuz. Animazio harmailaren eta tribunaren arteko desnibela segurtasun handieneko beirazko baranda batekin babestuko da.

Bi mailetan kokatutako ikusleen ikuspen ona ziurtatzeko, harmailaren lehen lerroak aurreratzea proiektatzen da, soropilarekiko 5,5 metroraino (orain distantzia 7,5 metrokoa da). Aldaketa horrek goiko aldeko ikusleen ikusmena bermatuko du, nahiz eta animazio harmailekoak zutik egongo diren partidak irauten duten bitartean.

Estadiorako sarbideak (sarrerak eta irteerak) eta zerbitzuak (komunak eta tabernak) independenteak izango dira bi espazio berrietako bazkide eta zaleentzat, hau da, Animazio Harmaila eta Ipar Beheko Tribunako goiko 11 ilarakoentzat.

Estadioko ebakuazio-ibilbideetan egin beharreko aldaketak ikusleen segurtasuna zainduz egin dira uneoro, betiere eskatzen diren gehieneko zabaleren eta ebakuazio-ibilbideen araudi-irizpideei eutsiz.

Era berean, zenbait neurri arkitektoniko hartu dira, egungo edukiera kopurua ez galtzeko. Ipar Beheko Tribunako 26. ilaran zeuden mugikortasun urriko pertsonak, gainerako tribunetan eta animazio harmaila berriko beheko ilaran birbanatzen dira, eta zale horientzako eta haien lagunentzako edukiera kopurua mantentzea lortzen da.