“Oso partida berezia da”

“Derbietan gertatzen dena beti handitzen da. Badakigu partida oso berezia dela eta irabazi nahi dugu”. Gaizka Garitanok agerraldia egin du Lezaman, bihar San Mamesen Realaren aurka bere taldeak jokatuko duen derbiaren atarian (14:00etan). Garitano, neurketari begira, “baikorra” da: “Partida garrantzitsua da bi taldeentzat. Oso partida berezia da eta biok irabazi nahi dugu, bai ala bai. Taldea ondo dago, gogotsu, eta partida ona egiten saiatuko gara hiru puntuak lortzeko. Baikorrak gara, prest gaude”.

Urteko azken norgehiagokan garaipen batek emango lukeen bultzada animikoaz jabetuta, entrenatzaile zuri-gorriak talde txuriurdinaren aurkako norgehiagoka oso ondo prestatu duela aitortu du: “Derbi baten aurretik beti pentsatzen duzu era positiboan, baina gero jokalarien esku gaude. Futbola da. Dena den, gu gehiago gaude gure mailaren mende aurkariaren mende baino. Gu ondo gauden guztietan, aurkariak sufritu egiten du. Aurkaria asko errespetatzen dugu eta ondo egon beharko dugu aurkaria ona delako. Astea ondo prestatu dugu eta puntuak etxean gera daitezen saiatuko gara”.

Taldeak atseden hartzeko denbora izan du neurketaz beteriko urtarrila baino lehen: “Oso talde fisikoa gara, atseden hau ondo etorri zaigu, baina une onean geunden ere. Ondo dago jokalari desberdinek edozein unetan joka dezaketen talde bat izatea. Konfiantza dut guztiengan, bai hasieratik irtengo direnengan, bai bigarren zatian sartu ahal direneengan. Partida asko datoz eta denentzako lekua dago”.

Garitanok Yeraydren baja deitoratu egin du, hurrengo partidak galduko dituelako, baina badaki badituela hura ordezkatzeko tresnak: “Pena bat, maila ona ematen ari zelako. Nuñez ondo dago ere eta bihar jokatuko du. Villalibre berreskuratu eta Yeray galdu dugu. Aurrera jarraitu behar dugu. Horrela dira gauzak”.