Iraia: “Talentua duen talde bat gara”

Iraia Iturregi ofizialki aurkeztu da, hedabideen aurrean, Athletic Clubeko emakumezkoen lehen taldeko entrenatzaile gisa. Orain arte bigarren taldearen arduradun nagusia izan dena pozik agertu da aurkezten zaion aukerarekin, baina une honetan “zirkunstantziengatik ez nuela buruan” onartu du. Iraiak bere sentimenduak azaldu ditu, Aitor Elizegi presidenteak eta Joseba Aguirre kirol zuzendariak lagunduta: “Oso egun zoriontsua da niretzat, pribilegioa baita Athleticeko entrenatzailea izatea. Une perfektua deskribatzen hasiko banintz, agian beste bat aukeratuko nukeen, denboraldi hasieran hutsetik abiatuta, alegia, baina une onena askotan ez da gertatzen eta errealitateari aurre egin behar zaio aurpegira begiratuz. Talentua duen taldea gara, agian orain bere bertsiorik onena ematen ari ez dena, baina buelta ematea espero dut. Lanean konfiantza izan behar dugu”.

Lehen taldeko entrenatzaile berriak bikain ezagutzen duen jokalari talde bat zuzenduko du: “Aldagela horretan giza talde bikain bat dago, gauzak txarto doazenean inoiz amore emango ez duena. Ahuleziei irtenbidea ematen jarri behar dugu arreta, eta ondo landutako alderdiak hartu behar ditugu oinarri”.

48 ordutan (igandea, 12:00etan), Athleticek SD Eibar hartuko du Lezaman. Iturregik, ia denborarik gabe, hiru puntuak eskuratzeko beharra azpimarratu du. Ondo ezagutzen duen taldea da, aurreko denboraldian bigarren talde zuri-gorria zuzentzen ari zela, Reto Iberdrolan aurre egin baitzion: “Partida berezia izango da. Ondo ezagutzen dugu elkar. Nahiago izan dugu Eibarren aurkako partida lehenetsi, eta ondoren izango dugu jarraitu beharreko ildoak zehazteko denbora. Hamabost eguneko geldialdia baino lehen hiru puntuak lortzeko konfiantzarekin goaz. Gure lehentasun nagusia Eibarri irabaztea da”.