Bilbao Athletic, bolada onari jarraipena ematera

Bilbao Athleticek Real Unionen aurka jokatuko du bihar Lezaman, 18:00etatik aurrera, Bigarren B Mailako II. multzoko A azpimultzoko hamaikagarren jardunaldiko partidan. Joseba Etxeberriaren taldea sailkapenaren goialdean dago, hamazortzi punturekin, eta bosgarren postuan dagoen Irungo taldearen aurka arituko da, hamahiru punturekin dagoena, zuri-gorriek baino partida bat gutxiago jokatuta.

Lehoi-kumeak une onean daude, zazpi partida galdu gabeko bolada kateatuz, bost garaipenekin (SD Amorebieta, Alaves B eta Barakaldo etxean mendean hartuta, eta Portugalete eta Reala B etxetik kanpo) eta bi berdinketekin, biak Lezamatik urrun (Leioa eta Laredo). Bilbao Athleticek lidergoari eutsi nahi dio, etxean indartsu jarraituz, non bere konpromiso guztiak irabazi dituen, Real Racing Cluben aurkako bigarren jardunaldiko partida izan ezik.

Biharko aurkaria ere dinamika onean iritsiko da. Gipuzkoarrek hiru jardunaldi jarraian daramatzate galdu gabe, Arenasen eta Racingen aurkako berdinketekin eta Portugaleteri gailenduta, azken honetan 93. minutuan Gexan Elosegiren golari esker. Hiru puntuak eskuratuz gero, Joseba Etxeberriaren mutilek hirugarren garaipena jarraian lortuko lukete Realaren bigarren taldea eta Barakaldo mendean hartu eta gero.