8 final 11 urtetan

2008-09 denboraldian Bartzelonaren aurka Kopako finala jokatu zuenetik, Athleticek 8 finaletan parte hartuko du.

2009ko maiatzaren 13an, Barçak 1-4 mendean hartu zien lehoiei Kopako finalean. Athleticek 2-1eko emaitzari buelta eman behar izan zion Sevillaren aurka finalerdietan, Mestallako final hura jokatu ahal izateko.

Hurrengo denboraldian, 2009-10ekoan, beste final batean parte hartu zuten, Superkopakoa. Urte hartan Caparrosen jokalariek ezin izan zuten garaikurra eskuratu: Camp Noun jokatutako joanekoan zein San Mameseko itzulikoan galdu zuten.

2011-12 denboraldian beste bi final ikusi genituen, Kopakoa Bartzelonaren aurka Vicente Calderonen eta Europa Leaguekoa Atletico Madrilen aurka Bukaresten. Athleticek ezin izan zuen bi garaikurretako bat bera ere altxatu eta bi partidetan hiru goleko aldearekin galdu zuen.

Hiru denboraldi geroago, 2014-15ean, lehoiak final baterako sailkatu ziren berriro, Kopakoa. Athleticek Bartzelona izan zuen aurrez aurre beste behin ere, oraingoan Camp Nou zelaian, eta kataluniarrek garaipena eskuratu zuten berriro.

Hurrengo denboraldian Athleticek titulu bat irabazi zuen, Superkopakoa. Zuri-gorriek talde gorri-urdinari aurre egin behar zioten, baina oraingoan garaipenak beste kolore batzuk izango zituen. Valverderen mutilek Barça mendean hartu zuten San Mamesen jokatutako joaneko partidan 4-0eko garaipena eta itzulikoan banako berdinketa lortuta. 31 urte pasa ziren Athleticek bere azken titulua lortu zuenetik.

Aurten lehoiek bi final dituzte jokoan, lehena, Superkopakoa, igande honetan FC Bartzelonaren aurka Cartujan (21:00etan). Jokatuko duten bigarren finala aurreko denboraldiko Kopari dagokiona izango da, 2019-20koa, Real Sociedaden aurka, hain zuzen ere. Iragan denboraldiko Kopako finala apirilaren 18an jokatzekoa zen, baina Covid-19ko pandemiaren ondoriozko arrazoiengatik atzeratu egin behar izan zuten, eta denboraldi honetan jokatzeke dago.