Marcelino: “Nagusi izan gara”

Athleticek Alcoyanoren aurka lortutako garaipenaren (1-2) ostean, Marcelino Garcia Toral entrenatzaile zuri-gorriak honela aztertu du Kopako final-laurdenetarako txartela eman dion partida: “Hasiera ona izan genuen, nahiz eta haiek zutoinera jaurtiketa bat egin. Gero partidaren kontrola izan genuen, baina egia da minutu askotan sakontasuna falta izan zitzaigula. Atsedenaldiaren ostean azkar berdindu genuen eta bigarren zatian Alcoyanok ez digu ia arriskurik sortu. Erasoko jokaldiak eta aukerak sortu genituen. Sakontasun handiago horrek, guztion lanarekin batera, eman digu garaipena. Erabateko bigarren zatia egin dugu eta orokorrean nagusi izan gara”.

Marcelinok Muniain, Raul Garcia eta Williams bigarren zatian zelairatu izanak berebiziko garrantzia duela onartu du: “Datuak hor daude eta badakigu hiru jokalari garrantzitsu direla. Distiratsu egoteak taldearen aukerak areagotzen ditu, argi dago; baina Morciren edo Sanceten higadura ere nabarmendu behar da, hasieratik atera ziren eta lan hori egin zuten taldekideek plus hori eman zezaten atsedenaldiaren ostean. Kopa irabazi? Oraingoz pozik nago lortzen ari garenarekin. Bost garaipen jarraian, Real Madrili eta Barçari Superkopa irabaziz, Getaferi sartutako bost golak eta Kopan lortutako bi garaipen hauek. Eta, batez ere, jokalarien eguneroko lanarekin geratzen naiz. Orain, bihar Kopako final-laurdenetako zozketan egoteaz gozatu behar dugu, eta igandean Bartzelonan jokatuko den partidan pentsatzen hasi”.