Iturregi: “Aurrerapauso bat eman behar dugu”

Iraia Iturregik komunikabideek egindako galderei erantzun zien Real Betisen aurka Primera Iberdrolako 18. jardunaldiko partida atzeratuan bihar Sevillan Felipe del Vallezelaian jokatu aurretik.

Athleticeko entrenatzaileak taldea “lehiatzeko gogoz” dagoela adierazi du. Sailkapenean bizi duten egoera dela eta (12. postuan) eta otsailaren 10etik Madril CFFren aurka partida ofizialik jokatzen ez dutela kontuan hartuta, lehoiek partiden beharra dute: “Puntuak batu nahi ditugu sailkapenean igotzeko. Entrenatzaile berria izanik, lasaitasun handiagoz lan egiteko aukera eman digu horrek, baina mentalki zaila da jokalariak dinamikan sartuta edukitzea”.

Biharko partidaren garrantzia goraipatu du: “Ez dut finaltzat hartzen, baina denboraldiko partida garrantzitsuenetako bat da”. Rayo Vallecanoren eta Sporting Huelvaren aurkako hurrengo bi partiden garrantzia ere azpimarratu du: “Hiru aste hauetan, hemendik denboraldi amaierara arteko helburuak zein diren zehaztuko digute. bederatzi puntu aterako bagenitu, helburu berriak plantetuko genituzte. Hala ez bada, helburu bakarra taldea lehen mailan mantentzea izango litzateke”.

Aurkariari dagokionez, Athleticeko entrenatzaileak ez zuen Betisen egungo sailkapena espero, lehoiengandik bost puntura baitago 17. postuan sailkatua: “Betisek kalitate handiko jokalariak ditu: jokaldiak lantzea gustatzen zaio eta baloi joko ona duten jokalariak ditu. Sailkapenean dagoen posturako, talde ausarta da”.

Duela egun batzuk senda-agiria jaso ondoren, Ane Azkona, belauneko lesio larria sendatua edukita, deialdian sartu da eta partida ofizial bat jokatu dezake berriro, 2020ko martxoaren 1etik ez bezala.

18 jokalariko deialdia:

Honako 18 jokalari hauek osatzen dute zerrenda: Amaia Peña, Andrea de la Nava, Ainhoa Moraza, Garazi Murua, Naroa Uriarte, Oihane Valdezate, Nekane Diez, Maria Diaz, Marta Unzue, Oihane Hernandez, Eunate Arraiza, Sophie Istillart, Ane Azkona, Lucia Garcia, Marta Perea, Vanesa Gimbert, Leyre Monente eta Irene Oguiza.