Emakumezkoen Athleticen kontu berria Twitterren

Martxoaren 8aren harira, eta Emakumeen Nazioarteko Egunearekin bat eginez, Athletic Clubek emakumezkoen kontu ofizial berria kaleratu du Twitterren. @AthleticClubFem profilean, athleticzaleek emakumezkoen atalaren gaurkotasun osoa aurkituko dute, lehen taldeari arreta berezia eskainiz: partiden kontaketa, albisteak, erreportajeak eta Athletic Club B eta harrobi zuri-gorriko gainerako taldeen emaitzak eta berritasunak.

Klubaren Twitterreko kontu generikotik bereizteak arreta pertsonalizatua eta zabalagoa eskainiko die emakumezkoen taldeei, eta, horrela, profil berriak Instagrameko (@athleticclubfem) kontuarekin bat egingo du. Primera Iberdrola osatzen duten 18 taldeen artean interakzio gehien dituen bosgarrena da gure Instagrameko kontua*.

Ligako partiden zuzeneko audioa

Kontu berri hau Twitterren estreinatzearekin batera, Athletic Clubek zerbitzu berri bat ere inauguratu du, eta, horri esker, zuzenean jarraitu ahal izango dira neskek denboraldia amaitu arte Primera Iberdrolan jokatuko dituzten neurketak. Telebista eskubideen inguruko gatazkaren ondorioz gure lehen taldearen partiden irudiak zuzenean ematea ezinezkoa denez, Athletic Clubek Youtuben duen kontu ofizialak zuzenean eskainiko du kontaketa, ahots narrazioarekink, partidak jokatzen dituzten zelaietatik. Klubaren webgunearen eta app ofizialen bidez ere jarraitu ahal izango da kontaketa, eta, hemendik aurrera, emakumezkoen taldeak Twitterren duen kontu berrian ere. Ekimena atzo hasi zen, Athletic Clubek Rayo Vallecanoren aurka lortutako garaipenarekin, Primera Iberdrolaren 21. jardunaldiko partidan, Vallecasko Kirol Hiritik.

*Instagram interakzioen ranking-a (uztailaren 1etik otsailaren 28ra)

Primera Iberdrolako taldeen kontu ofizialak

(Milaka interakziotan)

1. FC Barcelona 8.485
2. Real Madrid 8.406
3. Atletico de Madrid 4.626
4. Real Betis Féminas 879
5. Athletic Club 719
6. Real Sociedad 489
7. Sevilla FC 268
8. Levante UD 249
9. Valencia CF 228
10. RCD Espanyol 177