Elizegi: “Aurkari ona gara partida bakarrera”
Elizegi: “Aurkari ona gara partida bakarrera”
Larunbatean Bartzelonaren aurka jokatuko den Kopako finalaren aurretik eta ondoren “kontrola eta neurria” eskatu die Athleticeko presidenteak zaleei
Aitor Elizegi Athletic Clubeko presidenteak agerraldia egin du San Mamesen, 50 urte dituzten bazkideei sariak banatu aurretik. Taldearen egoera aintzat hartu du Realaren kontra galdu ostean eta Bartzelonaren aurka jokatu baino lehen lehoiak Koparekin itzuliko direla espero du. “Aurkari ona gara partida bakarrera”, azpimarratu du.
“Athletic talde gogorra eta lehiakorra da. Bartzelonak badaki partida zaila izango dela. Gure jokalariek egiten dakitenaz gozatzera atera behar dute”, azaldu du agintari zuri-gorri nagusiak.
“Langileen fidagarritasunak baikor sentiarazten nau. Espero dut gogoratzeko moduko partida izan dadila”, argudiatu du. “Nik datorren urteko apirilean egon nahi dut Supercopa bat irabazita eta Kopako final bat jokatuz. Lanean segitzen duenak lortu egiten du”, gaineratu du.
“Athletic gara, inoiz ez dugu pentsatu epaileak partida bat erabakiko duenik”, erantzun du zaratak zalantzan jarri ostean. “Zerbaitez harro bagaude, porrota klub gisa nola barneratu eta kudeatzen dugun da. Errespetu hori negoziaezina da. Jokalariek adibide bat eman zuten, ziur Lezamako beheko maila guztiak bereganatu zituztela. Galtzea tokatzen denean, estilo honekin izan dadila”.
“Kontrol, neurritasun eta lasaitasun gehiago” eskatu die zale zuri-gorriei, eta “taldea animatuz hiriaren bihotza kaltetzeko justifikaziorik ez” dagoela adierazi du.