Athletic Club, pertsona gorren inklusioaren alde

Euskal Gorrak, Pertsona Gorren Elkarteen Euskal Federazioak, zeinu Hizkuntzen Egunaren ospakizunean (ekainaren 14a), pertsona gor edo gor-itsu bat dagoen lekuetan zeinu-hizkuntza egon behar dela gogorarazten du.

Athletic Clubek bat egin du, San Mameseko argiztapenarekin, Euskal Gorrak egiten duen aldarrikapen honekin: hizkuntza propioan arreta jasotzeko, komunikatzeko, ikasteko edo informazioa jasotzeko eskubidearen aldarrikapena. Bestearekiko errespetuaz, aukerez eta berdintasunaz hitz egiten duen hizkuntza da zeinu-hizkuntza.

Euskal Gorrak Euskadi osoan gorren ordezkari diren elkarte-mugimendu guztiak biltzen ditu, haien erabateko integrazioa eta gizartean parte hartzea bilatuz, haien kultura, ohiturak, tradizioak eta hizkuntza propioa sustatuz.