Lehen taldea | 2021 urr 30

“Baikorrak gara, oraindik hobetzeko tartea daukagulako”

2021 urr 30

Joko eta emaitza aldetik dinamika onean dagoen arren, Marcelinok uste du bere taldeak hazten jarrai dezakeela, Realaren aurka jokatu eta 24 ordu pasatxora (21:00etan)

Marcelino Garcia Toralek hedabideen galderei erantzun zien Lezaman, Realaren aurka bihar 21:00etan Reale Arenan jokatu aurretik. Entrenatzaile zuri-gorriak garrantzia kendu dio derbia izateari eta puntuak batzen jarraitu nahi du: “Naturaltasun osoa ematen diot. Lehiaketan ditugun 19 aurkarietako bat da. Beste neurketa bat bezala aurre egingo diogu. Egia da alde emozional erantsi bat dagoela, batez ere jokalarientzat, eta hori kudeatzen jakin behar dugu. Benetako derbia bizitzeko aukera izango dugu, iaz ikuslerik gabe soso samarrak izan baitziren. Polita izango da ikuskizuna zelaia beteta bizitzea. Pribilegiatuak gara”.

Athletic Club 17 punturekin iritsi da hitzordura, hamar jardunaldi jokatu ondoren, eta bere taldea goranzko bidean dagoela uste du: “Datuek ondo gaudela diote. Gehienek uste dute merezi baino puntu gutxiago ditugula. Gero, denboraldi amaieran, dena berdinduta geratzen da, gutxi gorabehera. Pozik gaude denok, eta baikorrak gara, oraindik badugulako hobetzeko tartea “.Aurkariari dagokionez, Marcelinok honako hau dio: “Reala talde ona da, entrenatzaile handi batek zuzentzen du, eta proiektuari jarraipena ematen ari zaio. Orain lehiakorragoa eta fidagarriagoa da defentsan. Hainbat egoeratan izateko argudioak ematen dizkio. Atzealdetik ondo jokatzen du, aurreko urteetan adina arriskatu gabe, bertikala da eta jokamolde asko ditu. – Derbietan partidak pixka bat itxiago egiten dira eta, orain arte lortu dituzten zenbakiak ikusita, harritu egingo nintzateke partidan gol asko egongo balira. Asmatzen duenak hiru puntuak eskuratuko ditu”.