Lehen taldea | 2022 urt 9

Partida aurrekoa: Deportivo Alaves vs Athletic Club (LaLiga 20. J)

2022 urt 9

Gaur arratsaldean, 18:30etik aurrera, Mendizorrotzan jokatuko den norgehiagokaren xehetasun guztiak errepasatu ditzakezu hemen

Athletic Clubek Mendizorrotza bisitatuko du urteko bigarren derbian, LaLiga Santanderreko 20. jardunaldian. 18:30etik aurrera, Marcelino Garcia Toralen gizonek Deportivo Alavesen aurka neurtuko dituzte indarrak, 2022an daramatzaten bolada ona luzatzeko asmoz. Javi Calleja kargutik kendu berri duen talde babazorroak urtea estreinatu zuen Jose Luis Mendilibarren zuzendaritzapean, Realaren aurka berdinduta, Gasteizen ere jokatu zen beste derbi batean. Arabarrak jaitsiera postuetan daude 16 punturekin, baina orain haietatik kanpo dagoen Elche CF taldearekin berdinduta.

Aste honetan lortutako bi garaipenen ostean (Osasunaren aurka LaLigan eta Mancha Realen aurka Kopan), lehoiek bigarren garaipena jarraian lortu nahi dute erregulartasunaren txapelketan, datorren asteko Superkopari ahalik eta berme handienarekin aurre egiteko.

Deialdia

Kopako kanporaketaren eta joan den astelehenean jokatutako LaLigako partidaren ostean, Marcelinok 21 jokalari deitu ditu Arabako taldearen aurkako partidarako. Zerrendan Unai Simon, De Marcos, Vencedor eta Yerayren itzulera nabarmentzen da, ez baitziren osteguneko deialdian sartu erabaki teknikoagatik. Yuri, Villalibre, Capa eta Nuñez baja dira, azken hiru hauek lesionatuta baitaude, eta Artola eta Luis Bilbao lehoikumeak euren taldeetara itzuliko dira.

Marcelino

Marcelinoren adierazpenak hemen berriro ikusi eta entzun ditzakezu, Youtubeko gure kanal ofizialean, Alavesen eta Athleticen arteko LaLiga txapelketako 20. jardunaldiko partidaren aurreko prentsaurrekoan.

Aurkaria

1921ean sortua, hasieran zuen “Sport Friends” izena aldatu ondoren, Alaves 1929-30 denboraldian igo zen aurrenekoz Lehen Mailara. Ordutik aurrera, kategoria askotatik igaro dira arabarrak, eta hainbat krisialdi izan dituzte arlo ekonomikoan eta baita kirol arloan ere. 2000ko hamarkadan, maila gorenean zeudela, UEFA Koparako sailkatzea lortu zuten. 2001ean txapelketa horretako finala jokatu zuten, zaleentzat historikoa zen partida batean. Gasteiztarrek porrota jaso zuten Liverpoolen aurka (5-4).

Hurrengo urteetan, kirol-bolada txarrak, jaitsiera eta igoera berriekin, eta arazo ekonomikoak bizi izan zituzten berriro. 2011n ia desagertu egin zen kluba, baina Josean Querejeta buru zuen enpresa-talde batek agintea hartu zuen. Horren ondoren, 2016-17 denboraldian, bere historiako Kopako lehen finalera iritsi ziren eta porrota jaso zuten FC Barcelonaren aurka (3-1).

Gasteiztarrek 13. jardunalditik, azaroaren hasieraran, ez dute garaipenik lortu LaLigan. Orduan Javi Callejak zuzendutako taldeak 2-1 irabazi zion Levante UD taldeari Mendizorrotzan.

Estatistikak

1930ean LaLigan lehen aldiz jokatu zutenetik, Alavesek eta Athleticek 33 partida jokatu dituzte maila gorenean, eta zuri-gorriek balantze positiboa izan dute: 21 garaipen, 6 berdinketa eta 6 porrot.

Babazorroen zelaian jokatutako partidei dagokienez, balantzeak positiboa izaten jarraitzen du, Athleticek zortzi garaipen, hiru berdinketa eta bost porrot lortu baititu Mendizorrotzan.

Athleticek, etxetik kanpo, bi taldeen arteko azken bost norgehiagoketan, ez du garaipenik lortu. Lehoiek lau porrot eta berdinketa bat pilatu dituzte.

Kontsultatu Alavesen aurkako estatistika guztiak.

Athleticzaleak munduan zehar

Zauden lekuan zaudela, ziurtatu gure Athleticen partida ez duzula galtzen.

Erlazionatutako partidak