“Irabazteak oso egoera onean jarriko gintuzke sailkapenean”

“Txapelketaren bigarren herenean sartu gara eta partida guztiak oso garrantzitsuak dira, gero eta gutxiago geratzen da. LaLigako bolada oso on batean gatoz eta bihar irabazteak sailkapenean oso egoera onean jarriko gintuzke”. Marcelino Garcia Toral oso argi azaldu da Athleticek bihar Mallorcaren aurka jokatuko duen neurketak sailkapenari dagokionez garrantzi handia duela ikustarazteko orduan. Lehoiek hiru puntuak lortuta, Europako postuetan egongo lirateke: “Oso garrantzitsua da eta horrela hartu behar dugu neurketa, lehen minututik. Etxean aurkariaren zenbakiak onak dira, bere zelaian irabazten oso zaila den taldea da. Ilusio guztiarekin goaz, Kopa itzulerako partidara arte baztertu nahi dugu eta, hemendik aurrera, Ligan jarri arreta. Gure ideiak izan behar du partidarik garrantzitsuena berehalakoa dela”.

Lehoiak sasoi onean daude eta 2022an porrot bakarra izan dute. Marcelinok eta talde teknikoak hasieratik lortu nahi zuten pentsamolde irabazlea lortu dute bere jokalarietan: “Ezin dugula hobetu uste izango banu, Athleticen hilobia zulatzen ariko nintzateke, eta jokalariek hala uste badute, gure errendimenduaren gainbehera hasten ari gara. Ez dut hori pentsatu nahi. Ahalik eta etekin handiena bilatu behar dugu. Pentsamoldeak jarraitutasunera, esfortzura, partida guztiak irabazi nahi izatera eta egunetik egunera hobea izatera garamatza, horrek guztiak hobetuko gaitu”.

Zuri-gorriek bihar itxiko dute liga txapelketako 24. jardunaldia, etxetik kanpo, zaleen aurrean puntu gehienak lortu dituen aurkariaren aurka: “Talde zaila da han. Nik irabazi nahi dut, berdintzeak ez nau kontsolatzen eta porrota penaz hartuko nuke. Pentsamolde bakarra da ahalik eta gehien egitea irabazteko. Ondo gaude eta horrela jarraitu behar dugu”.