“Bartzelonan partida ona jokatu gabe, ez gara berdin iritsiko finalerdira”

Unai Vencedorrek komunikabideen galderei erantzun zien joan den jardunaldian zelaira itzuli ostean, bost asteko lesioa gaindituta: “Pixkanaka noa, baina sentsazio oso onak izan ditut. Pozik nago taldeari berriro laguntzeagatik hainbeste denboraren ondoren. Futbolak gauza hauek ditu, inoiz baino indartsuago egon behar zara, eta hobeto itzuli“.

Athletic Clubek FC Barcelona bezalako aurkari handi baten aurka jokatuko du igandean, Valencia CFren aurka Kopako finalerako txartela jokatu aurretik. Erdilari zuri-gorria hurrengo partida bakarrik dauka buruan: “Barçaren partidari begira gaude eta asteazkeneko neurketan pentsatu gabe joango gara hara. Une onean dagoen arren, gu ere bai. Beste norgehiagoka bat bezala planteatzen dugu eta garaipena bilatuko dugu. Ez dut denbora asko eman hemen, eta argi dago ez dela Barça bera, baina kontu handiz ibili behar da haiekin. Bartzelonan partida ona jokatu gabe, ez gara berdin iritsiko finalerdira“.

Zuri-gorriek argi eta garbi gainditu zuten Reala iragan asteburuko derbian, eta Vencedorrek esan du moralez gainezka egingo dietela aurre hurrengo erronkei: “Ilusio berezia egiten duen partida da eta 4-0 irabazita are gehiago. Realari horrela irabaztea pozgarria da eta indar gehiago eman digu, baina emaitzaz haratago taldearen egoera berresten du. Plan horretan jarraitu behar dugu“.