Mainzek eta Bochumek Athleticen denboraldi-aurrearekin bat egingo dute Alemanian
Mainzek eta Bochumek Athleticen denboraldi-aurrearekin bat egingo dute Alemanian
Talde zuri-gorriak stage bat egingo du uztailaren bigarren hamabostaldian, Alemaniar lurretan, eta lau lagunarteko partida jokatuko ditu
Athletic Clubek Alemanian egingo du 2022-23ko denboraldi-aurreko stagea. Uztailaren 16tik 23ra bitarte, talde zuri-gorria Alemaniako lurretara joango da lagunarteko lau partida jokatzera, horietako hiru Bundesligako aurkari banaren aurka. Borussia Mönchengladbachen eta MSV Duisburgen aurka iragarrita zeudenei VFL Bochum eta Mainz 05, zortzigarren eta hamahirugarren sailkatuak gehitu zaizkie.
Lehoiak uztailaren 17an estreinatuko dira Duisburgoko Tradizio Kopan, Borussia Mönchengladbach (17:00etan) eta MSV Duisburg (18:00etan) taldeen aurka. Bi neurketak Schauinsland-Reisen-Arena estadioan jokatuko dira eta bakoitzak 45 minutuko iraupena izango du.
Txapelketa amaitu ondoren, Harsewinkeleko Athletic Stage hotelera joango da, Ipar Renania-Westfalia estatuan. Leku ezaguna da lehoi gehienentzat, 2019an bertan egin baitzuten denboraldi-aurrearen zati bat Garitanorekin.
Uztailaren 21ean, osteguna, gertu dagoen Gütersloh hirira mugituko dira. Bertan, VFL Bochum-en aurka jokatuko dute Heidewaldstadion-en, 18:00etan.
Ostiralean Harsewinkeleko kontzentrazio hotelari agur esango diote Mainzera hegan egiteko eta larunbatean Mewa Arenan Mainz 05 taldearen aurka jokatzeko 17:00etatik aurrera. Norgehiagokak berezitasun bat izango du: 60 minutuko bi denbora jokatuko dira. Alemaniako stagearen amaiera izango da, lehoiek partida amaitu ondoren Bilborako bidea hartuko baitute.