Tiko, Leicester Cityko Pitxitxia

Pitxitxik sartu zuen San Mameseko lehen gola, Irungo Racingen aurka 1913ko abuztuaren 21ean jokatutako partidan. Zuri-gorrien aurrelari ospetsuak 5. Minutuan sartu zuen gola, eta talde gipuzkoarraren erantzuna bederatzi minutu beranduago iritsi zen Patricio Arabolazaren bitartez (1-1).

Leicester Cityko zaleek (2016ko Ingalaterrako Premier Leagueko txapeldun harrigarria eta azken denboraldian zortzigarren sailkatutakoa, Athletic bezala), duela bi hamarkada bizi izan zuten egungo estadioaren estreinaldia.

King Power 2002ko uztailaren 23an inauguratu zen ofizialki, orduan Walkers Stadium izenarekin. Leicester taldeko Gary Lineker aurrelari ohia, FC Bartzelonako jokalari ohia eta Ingalaterrarekin 86ko Munduko Txapelketako golegile nagusia, guraize erraldoiak erabili zituen zelai berriko zinta mozteko, estadiora kamioi batean iritsi ondoren. 

Protokolozko ekitaldia izan zen, eta 2002ko abuztuaren 4an jarraitu zen festarekin, lehoien aurkako lagunarteko partida batekin, "Azerien" feudoan.

Jupp Heynckesek zuzentzen zuen talde zuri-gorria, Ingalaterrako denboraldi-aurreko biran murgilduta, Leicester Cityko estadio berriko berdegunera zelairatu zen hamaikako honekin: Aranzubia; Larrainzar, Murillo, Aitor Ocio, Larrazabal; Urrutia, Orbaiz, Tiko; Arriaga, Javi Gonzalez eta Aduriz. Bigarren zatian Alañak, David Karankak eta Carlos Merinok hartu zuten parte. 

Gauzak ez ziren ondo hasi lehoientzat, Aduriz gazte batek, lehen taldearekin zuen bigarren konpromisoan, txartel gorria ikusi baitzuen etxeko atzelari bati ukondokada bat emateagatik 27. Minutuan. 

Bigarren zatian, King Power Stadiumeko lehen gola sartu zuen Tikok, falta jaurtiketa bat maisuki eginda. 

Partidaren amaieran, Jordan Stewart jokalariak behin betiko 1-1ekoa ezarri zuen markagailuan, San Mameseko inaugurazioan eman zen emaitza bera. 

Leicester Cityko zelaira 24.000 zale hurbildu ziren egun hartan. Ezin izan zen asistentzia-zifra ofizialik erregistratu, arazo informatiko bat egon zen eta.

Jakina, topaketa hark oihartzun handia izan zuen East Midlandseko herri hartan. Micky Adams entrenatzaileak berak adierazi zuen 'gustura' zegoela Athletic bezalako aurkari ospetsu baten aurka jokatzeaz hain egun garrantzitsuan. Talde ingelesak Premier Leaguera igotzea lortu zuen 2002/03 denboraldian, etxean bi partida bakarrik galduta denboraldi hartan.

Filbert Street zelai zaharra, 1891tik 2002ra Azerien etxea izan zena, iragana zen jada. Eta gaur, Tikoren gol historiko hark hogei urte bete ditu.