Athletic EFT, bidea ireki zuten lehoiak

Denboran jauzi bat egon ez balitz bezala, joan den igandean Lezamak egun ahaztezina bizi izan zuen. Gauza bera gertatu zen duela hogei urte lehen aldiz 11 emakumek Athletic Clubeko armarri historikoa defendatu zutenean. Orduan, egutegiak 2002ko urriaren 6a markatzen zuen, arkua oraindik San Mames gainean Luis Briñas kalearen aurrean zegoela, kirol-instalazioek oso bestelako irudia zuten eta inork ezin zuen imajinatu lehen lehoi haiek ekarriko zituzten arrakastak.

Javier Uria zendutako presidenteak planteatu zuen bere hauteskunde-programan emakumeentzako talde bat sortzea erakundearentzat. Proiektu horren egileak Andoni Zubizarreta eta Ernesto Valverde lehoi ohiak izan ziren, kirol-zuzendaritzaren buru. "Txingurri" arduratu zen Bizkaiko emakumezkoen futbolaren egoerarekin eguneratzeaz, eta orduan estatuko bigarren mailan lehiatuz eta Superligara igotzea oso gertu zegoen Leioa EFT xurgatuko zutela ondorioztatu zuen. Superliga bat non Levante UD zen gainditu beharreko aurkaria eta jarraitu beharreko adibidea.

Valverdek Iñigo Juaristi Leioako taldeko entrenatzaileari egindako deiak ilusioa piztu zuen. "Igoera lortzen badugu, datorren urtean Athleticeko jokalariak izango gara", hori da entrenatzaileak bere jokalariei Raycoren aurkako partida erabakigarria jokatu baino egun batzuk lehenago helarazi ziena. Neuketa hura jipoitan amaitu zen eta ametsa egia bihurtu zen. Sarrienan partida gogoangarri hura jokatu eta hilabete batzuetara, Iñigo Juaristik gidatutako futbolarien blokea Lezaman lurreratu zen, Athletic Club EFT bihurtuta. Jose Angel Iribarrek berak aukeratu zuen hasierako nomenklatura.

Aitzindari harroak

Eta horrela abiatu zen emakumeen saila. Emakume futbolariak elastiko zuri-gorria Estatu osoko zelaietan erakusten, Athletic Cluben filosofia bakarra naturalki partekatzen. Ikusmina handia izan zen, eta lehoiek milaka lagun bildu zituzten 2002-2003ko Superligako estreinaldian; izan ere, Athletic izan zen bere futbol zelaiko ateak ireki zituen lehen kluba. Lehen denboraldi hartan, Juaristiren taldea txapeldun izan zen (puntuetan berdinduta -55- Levante UD taldearekin). Katedral zaharrean 35.000 arimaren aurrean ospatzea eta beste guztia historia da. Bost titulu, 100 jokalari baino gehiago debutatzen eta talde aitzindari hartako benjaminak, Iraia Iturregik, entrenatutako lehen taldea hornitzen duen harrobia.

Hogei urte igaro dira jada lehen urratsetatik, eta Athletic Clubek hasieratik bere emakumezkoen atala zaindu duela pentsa dezake. Izan ere, Valverdek dioenez, "bere gain hartu zuen dena normal eta osasuntsu. Erabat asmatu genuen". Beteranoek, ostiralero futbolerako gogoa entrenatuz kentzen dutenek, joan den igandean Lezaman Athletic Cluben eta Real Madriden arteko norgehiagokan harmailetako beroa jaso zuten. Inbidia osasuntsuaren eta harrotasunaren arteko nahasketa batek hartu zituen.

Horiek izan ziren Athleticeko lehen jokalariak, txapeldunak eta egunen batean lehoi bihurtzea eta San Mamesen orro egitea amesten duten neskatoei bidea ireki zietenak.