"Sentsazio onekin joan nahi dugu geldialdira"

Ernesto Valverde Athletic Clubeko entrenatzaileak bere iritziak eman ditu Real Valladolid CF taldearen aurka San Mamesen jokatuko duten LaLigako hamalaugarren jardunaldiko partidaren atarian. Gironan galdu ostean, lehoiek garaipenaren bidera itzuli nahi dute: "Partida garrantzitsua da, ligako azkena baita geldialdiaren aurretik, eta sentsazio onekin joan nahi dugu. Sentsazio txarrekin galtzetik gatoz eta zaila izango da haiek ondo daudelako eta azken lauetatik hiru irabazi dituztelako. Porrot bat jaso ondoren nahi duzuna egoera ez luzatzea da, zauri hori lehenbailehen ixteko. Bihar izango dugu lehen aukera, gero denentzat geldialdi luzeegia dagoelako intzidentziarekin. Nola doan ikusi behar da, hori ziurgabetasuna baita".

Aurkariari dagokionez, entrenatzaile zuri-gorriak bere bertuteak azpimarratu ditu: "Ausartak dira eta goian estutzen saiatzen dira. Teknikoki oso onak diren jokalariekin baloiarekin zer egin badakien taldea da, bai zelai erdian, bai defentsako lerroan. Berdintasun handia dagoela ikusten dut eta behetik datozen taldeak ere indartsu daude. Ondo jokatzen dutela ikusten da eta Valladolid horietako bat da".

Azkenik, Valverdek egungo egoeraren diagnosi txiki bat egin du: "Garrantzitsuena zure burua kokatzea da. Txapelketaren herena daramagu, eta zure helburuak bete nahi badituzu, puntuak batzen joan behar duzu azken herena iristen denerako. Gauzak hobeto egin behar ditugu. Egia da hasiera ona izan dugula gauza on askorekin, baina batez ere azken partidak etxetik kanpo kontuan hartuta, ikuspegi guztietatik pixka bat biribilago jokatu behar dugu. Azkenak zapore txarra utzi digu. Hirugarren postuaren eta gure artean hiru puntu daude eta atzetik datozenak ere gertu daude. Berdintasun handia dago, eta dena erabat kontzentratuta egoteagatik eta beti irabazteko beharrarekin jokatzeagatik definitzen da dena. Hori ondo doakigu guri".