Helburua: Kirolean haurren aurkako indarkeria GELDITZEA
Helburua: Kirolean haurren aurkako indarkeria GELDITZEA
Haurrek ingurune seguruan kirola egiteko dituzten eskubide unibertsalak aldarrikatu ditu Athletic Clubek Haurren Munduko Egunean
Athletic Clubek eta Fundazioak, Aterpe Programaren eskutik, Haurren Munduko Eguna ospatuko dute gaur, helburu argi batekin: kirolean haurren aurkako indarkeria GELDITZEA. Unai Simonek, nazioarteko atezain zuri-gorriak, bat egin du aldarrikapen honekin, adingabeen aurkako indarkeria mota hau gelditzeko beharra aldarrikatzen duen bideo txiki baten bidez. Zeregin hori guztion gain dago; izan ere, gizarte osoa arduratu behar da kontrol-mekanismoek eta haurren eskubide unibertsalak bermatzeko beharrezkoak diren prozesuek eta baliabideek funtzionatzeaz, 1989an Haurren Eskubideen Adierazpen Unibertsalean onartutakoak.
Haurrak babestea da, hain zuzen ere, Athletic Cluben Aterpe Programari zentzua ematen dion lana, kirol-erakundeen artean aitzindaria den ekimena. Horrela, Aterperen bidez, Athletic Clubek barne-lanean dihardu indarkeria-egoerak prebenitzeko, kirol-profesionalak arlo horretan trebatuz eta edozein alarma-seinaleren aurrean jarduteko protokoloak egokituz.
Ate barruko lanarekin batera, Aterpe programak laguntza ematen die hitzartutako klubei, kirol-erakundeei eta erakunde publikoei, elkarrekin lan egiteko haurren aurkako indarkeria GELDITZEKO.
“Parents in Sports”, Haurren Babeserako funtsezko gida
Aterpe programak badaki familiak eragile erabakigarriak direla haurren aurkako indarkeria desagerrarazteko helburu komun horretan. Horregatik, Aterpe Programak “Parents in Sports” (Sport Parents EU) Europako proiektuan parte hartzen du, Haurren Babeserako funtsezko gida.
2017an abiarazitako Sport Parent EU nazioarteko proiektua da, eta kirolean parte hartzen duten haur eta gazteen gurasoei, zaintzaileei eta tutoreei ematen zaien laguntza hobetzea du helburu. Laguntza honekin, haurrek eta gurasoek kirolean esperientzia atseginagoa eta seguruagoa izatea espero da. Swanseako Unibertsitateko Camilla Knighten zuzendaritzapean, Europar Batasuneko Erasmus + programarekin batera finantzatutako lankidetza-proiektu honek Europa osoan gazteen kirolaren arloan lan egiten duten akademikoen eta profesionalen esperientzia du oinarri.
Aterpe programak bere egiten ditu nazioarteko proiektu honen gomendioak, eta gurasoei Haurrak Babesteko eta laguntzeko oinarrizko tresna batzuk emateko lan egiten du. Beste urrats bat da helburu bera lortzeko: kirolean haurren aurkako indarkeria GELDITZEA.