"Lotura berezia dago Klubaren barnean"

Athletic Clubeko entrenatzaileak, Ernesto Valverdek, Klubak futbola eta kultura uztartzearen alde egindako apustua goraipatu zuen; izan ere, ikuspegi honek "pertsona guztiak ideia beraren parte sentitzea eragiten du, zerbait bereziaren barruan baleude bezala".

Iaz, argazkigintza maite duen Valverdek Athletic Club Fundazioarekin elkarlanean aritu ziren bere argazkiak Bilbon erakusteko, 'Beste Aldea' izeneko erakusketa batean. "Autobusean eraman ohi dut kamera, lehen lerroan ikuspegi pribilegiatua dudalako", azaldu zion Valverdek Martin Ainstein kazetariari, ESPN kate estatubatuarrean ‘Diarios de bicicleta’ telesailean. "Klubak erakusketa bat egin nahi izan zuen nire argazkiekin, eta, egia esan, esperientzia handia izan zen", gaineratu zuen entrenatzaile zuri-gorriak.

Ernestok uste du Athleticek futbolaren eta kulturaren arteko zubiak eraikitzeko duen helburuak eragin positiboa duela Klub osoan: "Hemen ez dago amets egiteari uzteko tarterik. Konexio berezia dago taldearen barruan, jokalarien eta Kluba osatzen duten guztien artean. Denek norabide berean bultzatzen dute".

Athletic Club Fundazioaren kultur programa bakarra mundu osoan da ezaguna. 2010az geroztik, Letrak eta Futbola Jaialdia antolatzen du Fundazioak. Jaialdi horretan, kultura arloko pertsona garrantzitsuekin egiten dira topaketak, eta kirol, gizarte eta kultura-testuinguruari dagozkion gaiak jorratzen dituzte.

Gainera, 2013az geroztik Thinking Futbol Film Festival jaialdia ere ospatzen du Klubak. Bertan, futbolaren munduan istorio indartsuak eta gizatiarrak kontatzen dituzten filmak proiektatzen dira.

"Entrenatzaile bat eta klub bat bata bestearen ispilu dira, non futbola eta kultura gauza bera diren", ondorioztatu zuen Ainsteinek Valverderekin izandako elkarrizketaren amaieran.