"Athletic maila gorenera eramatearekin amets egingo dugu"

Mikel Gonzalez Athletic Clubeko Futbol Zuzendari Orokorra da jada. Jon Uriarte presidentearekin batera aurkeztu dute ofizialki San Mameseko Jose Iragorri prentsa aretoan. "Harro egoteko modukoa da. Bilbokoa naiz, oso futbolzalea, eta bizitza osoan egin dut amets hemen egotearekin. Erronka erantzukizun handiz hartzen dut, talde hau gorenera eramateko ilusioarekin. Athleticen oso gauza handiak egitearekin amets egingo dugu", adierazi du getxotarrak.

Presidentearen hitzetan, "Mikel Gonzalez kirol proiektuaren giltzarria da, Klubean arlo honetan hartzen diren erabakien arduradun nagusia. Oso kargu garrantzitsua da, kanpainan esan genuen eta mantendu egiten dugu. Athleticentzat funtsezkoa den erabakia hartzeko denbora behar izan dugu. Mikelek hilabete hauetan erakutsi du prest dagoela erantzukizun hori bere gain hartzeko, proiektuan bete-betean tokia duen profila baita".

Izendapenaren arrazoiei dagokienez, Uriartek azpimarratu du erabakia Klubeko hainbat estamentuk hartu dutela: "Kanpainan bilatzen genuen profilaren antzekoa da. Adin bikaina du, lehen eskuko esperientzia futbolean, prestakuntza handia eta gosea arloan lan egiteko. Zuzendaritza Batzorde gisa, asko baloratzen ditugu alderdi horiek guztiak. Futbolaren industriatik Mikeli buruz lortu genituen balorazioak bikainak izan ziren fitxatu genuenean eta orain egiaztatu dugu. Erabakian parte hartu dugun alderdi guztiak ados egon gara: Zuzendaritza Batzordea, zuzendari nagusia, Lezamako zuzendaria, Ernesto Valverde eta Xabi Arrieta emakumezkoen futboleko kirol-zuzendaria. Primeran egokitzen den figura da. Gainera, teknologia berriekiko eta datuen azterketarekiko, hizkuntzarekiko eta alderdi ekonomikoarekiko duen sentsibilitatea oso ondo egokitzen da guk bilatzen genuenera".

Mikel Gonzalez eta Jon Uriarterekin batera, Jose Angel Iribar, Jon Berasategi zuzendari nagusia, Sergio Navarro, Xabi Arrieta, Eneko Boveda eta Ander Vidal Lezamako kirol zuzendaritzako kideak eta Jon Salinas eta Xabi Alvarez zuzendariak izan dira aurkezpenean.