DIGIren aurkezpena Lezaman

DIGIren aurkezpena Lezaman

Athletic Cluben babesle ofiziala den telekomunikazio-operadoreak gure instalazioak bisitatu ditu, babes-akordioa sinatu ondoren

Athletic Clubek DIGIren bisita hartu du Lezamako instalazioetan, 2023-24 denboraldira arte Klubaren babesle ofizial bihurtu ondoren. 

Athletic Clubeko Zuzendari Nagusiak, Jon Berasategik, babesle berriaren ordezkaritza hartu du gurean, Angel Alvarez buru dutela. Gure kapitainetako bik, Iker Muniainek eta Oscar de Marcosek, topaketan parte hartu dute ere. Ondoren, DIGIren ordezkaritzak Lezamako eta San Mameseko instalazioak ezagutu dituzte.

Angel Alvarez oso pozik agertu da sinatutako akordioarekin: "Oso harro gaude hainbeste historia duen Klub honi lagundu ahal izateagatik. Oso identifikatuta sentitzen gara Athleticekin, konpromisoa eta talde-lana bezalako balioak gureak ere direlako. Ziur gaude arrakasta asko lortuko ditugula elkarrekin". 

Jon Berasategik, bere aldetik, adierazi du: "DIGI etengabe hazten ari den enpresa bat da eta harro gaude gurekin bat egitea erabaki dutelako. Gure zonaldearen aldeko apustu argia egin dute eta eskutik joango gara helburuak batera lortzen jarraitzeko".