"Europa ametsa eta egia bihurtzeko borrokatuko dugu"

Ander Herrera komunikabideen aurrean agertu da Lezaman. Taldeak ateak irekita egindako entrenamenduaren ostean, Athletic Cluben momentua baloratu du erdilariak: "Taldeki balorazioa oso ona da: posizio bikaina sailkapenean, Kopako kanporaketa bat pasa eta Bilbotik gertu beste kanporaketa bat jokatzeko aukerarekin. Niri dagokidanez, une batzuetan ekarpenak egin ahal izan ditut, baina ez nahiko nukeen erregulartasunarekin. Minutuak batzen saiatzeko eta, guztiaren gainetik, taldea dagoen postu horietan mantentzeko lanean ari naiz. Ilusio handia egiten digu datorren denboraldian Europan Kluba ordezkatzeak. Amets bat da eta horregatik borrokatuko dugu".

Txapelketa ofizialera itzultzea oso "gogorra" izango da, baina Herrerak taldearen lan egiteko eran eta taldekideen konpromisoan konfiantza du: "Zalantzarik gabe oso norgehiagoka garrantzitsuak dira, denboraldi amaieran Europaren alde borrokatuko duten taldeen aurka. Onena da beti berdin jokatu ditugula partidak, aurkaria edozein dela ere. Prestatzeko modurik onena hurrengo neurketari garrantzitsuena balitz bezala aurre egitea da, errespetu osoz eta gure bertsiorik onena ateraz. Igande honetan, Chivasen aurka San Mamesen, aukera ezin hobea da, gure zaleekin batera". 

Itzuli ondorengo lehen hilabeteengatik galdetuta, erdilariak Kluba goraipatu du: "Beti nabaritu dut jendearen maitasuna, eta orain, itzuli naizela, ere. Ni neu izaten saiatzen naiz, eta jarrera eredugarria erakusten. Gazteek ikus dezatela aurrera egiten eta gauzak ondo egiten, kirol-ibilbide zoragarriak egin eta gauza oso onak lor daitezkeela. Athletic aldatu egin da azpiegiturei dagokienez, baina Kluba guztiaren gainetik jartzen duen jende umila eta langilea hemen da oraindik. Athletic inoiz baino biziago dago".