Gernikako Arbola Saria: formatua, baloreak eta garaikurra

Gernikako Arbola Saria: formatua, baloreak eta garaikurra

San Mamesek Athletic eta Chivasen arteko lehiaren lehen partida hartuko du igande honetan; itzulikoa Mexikon jokatuko da uztailaren 16an

Gernikako Arbola Sariaren joaneko partida igande honetan jokatuko da (abenduaren 11n, 19:00etan Bilbon eta 12:00etan Guadalajaran, Mexikon), San Mamesen.

Athleticen eta Chivasen arteko lehia bikoitz honek karga sinboliko handia du. Lehenik eta behin, berdegunean, kirol filosofia dela eta munduan paregabeak diren bi talde jokatuko baitute elkarren aurka. Bestetik, txapelketaren formatuak berak badu bere istorioa. Haren garaikurra da adibiderik argiena. Suz markatutako enbor zati bat, sinbolo esanguratsu askorekin: zuhaitza, sustraiak, ezkutuak, bertoko futbolariak.. Bi zatitan banatutako garaikurra da, eta txapelduna zein den jakitean baino ez da batuko. Ordura arte, talde bakoitzak zati bat gordeko du.

Zuhaitza bi taldeetako historiaren eta ezkutuen zati garrantzitsua da; baita sustraiak ere, bi klubek aldarrikatzen duten kirol filosofia dela eta: euren lurraldeko jendearekin jokatzea. 

San Mameseko neurketan, partidara hurbiltzen diren athleticzaleei deigarria egingo zaie lehoiek bigarren elastikoa jantzita zelairatzea. Chivasekin hitz egin ondoren, bi klubek erabaki dute kolore zuri-gorriak talde bisitariak jantziko dituela, abegi onaren erakusgarri. Kortesiazko keinu hau ohikoa zen futbolaren jatorrian. Horrela, Chivas zuri-gorriz arituko da San Mamesen eta hala egingo du Athletic Clubek ere uztailean Mexikoko Akron zelaian jokatuko den neurketan. 

Golen abantailarik gabe, emozioz jositako lehia baten alde

Gernikako Arbola Saria irabazteko ez da bi taldeen arteko gol-averagea kontuan hartuko, antzinako erara egingo da. Hau da, taldeetako batek partida bat irabazten badu, aldea edozein dela ere, eta beste taldeak bestea irabazten badu, emaitza edozein dela ere, penaltien txandan erabakiko da lehia (bost talde bakoitzeko, eta berdinketak jarraitzen badu, beste bat talde bakoitzeko, irabazlea erabaki arte).

Gainera, bi partidetan ez da aldaketetarako mugarik egongo. Hori bai, hiru txandatan egin beharko dira gehienez, atsedenaldikoa kontutan hartu gabe.

Azken finean, sinbologiaz eta zentzuz betatko bi kluben arteko ohiko erronka izango dugu igande honetan San Mamesen.