2022a sentsazio onekin ixtera

Aste berean, Athletic Clubek Sevilla zapalduko du berriro. Larunbatean, Jesus Navas estadioan, Sevilla FCren aurka neurtuko ditu indarrak Liga F-ko 13. jardunaldiari dagokion norgehiagokan. Lehoiek urteko azken konpromisoa izango dute 2022ari amaiera emateko, eta ahalik eta ondoen jokatu nahi dute, Benito Villamarinen Real Betisen aurka galdu ondoren.

Norgehiagokak erregulartasuna bilatzen duten bi talde jarriko ditu aurrez aurre. Sevillako taldea 2 goleko aldeaz erori zen Ibaian Deportivo Alavesen aurka joan den jardunaldian eta ez da espero zen emaitzarik aurkitzen ari. Oraingoz hamaikagarren postuan dago, 12 punturekin, zurigorriak puntu bakar batera daudelarik. Norgehiagoka, aurreko astean gertatu zen bezala, erabakigarria izango da berriro ere sailkapenean aurkariak atzean uzteko.

Sevilla FC nabarmen indartu zen uda honetan Cristina Martin Prieto, Silvia Meseguer, Amanda Sampedro, Eva Llamas edo Arola Aparicioren fitxaketekin. Plantilla oso lehiakorra da, bere zelaian partidak aurrera ateratzen dituena, baina emaitzetan jarraitutasunik aurkitzen ez duena. Hiru partida irabazi ditu, beste hainbeste berdindu eta sei porrot jaso ditu denboraldi honetan.

Estatistikek Sevillan lehoiei irribarre egiten badiete ere, larunbateko lehia oso zaila izango da, eta Iturregire neskek, baja ugari izan arren, euren bertsiorik onena erakutsi beharko dute Gabonetako etenaldiaren aurretik emaitza positiboren bat ateratzeko.