125. urteurrenak inaugurazio erraldoia izan du

125. urteurrenaren inaugurazioa ia perfektua izan da San Mamesen. Lehoiek Sevillan hiru puntuak irabaztea besterik ez da falta izan, ondo merezitako jokoagatik. Baina gogoan geratuko da familia athleticzalearen erantzun zoragarria, festarekin bat egin baitu gorputzez eta arimaz. 22.719 pertsona elkartu dira Katedralean, ospatzeko, abesteko eta munduan bakarra den klub bateko kide izatearen harrotasuna adierazteko.

Arratsaldea Genuine taldearen 'haka' eta Bilboko Abesbatzak, Taberna Ibiltariak, Chimberotarrek eta Iñigo Cabacas Herri Harmailak gidatutako abestiekin hasi da. Jon Gomezek, zeremonia maisuak, giroa berotu du bere energia izugarriarekin. Hasiera-hasieratik hasi da publikoa birika betean kantatzen. San Mames, kantuz, festa handia izan da, eta emakumezkoen lehen taldeak jarri du azken ikutua, harmailarekin batera Athletici 'Zorionak zuri' abestuz.

Ondoren, arratsaldeko unerik zirraragarriena iritsi da. Txetxu Rojori egindako omenaldi handiaren ondoren, ikusleak zutik jarrita eta mito zuri-gorria txalotuz, pantaila erraldoietan Jose Angel Iribar eta Eli Ibarra elezaharrak agertu dira. 125. urteurreneko bandera ofizialaren igoeraren txanda iritsi da. Bandera Katedralaren estalkira igo da Agur Jaunak eta Andreak entzuten zen bitartean. Une hunkigarria benetan.

Eta azkenean lehoien ordua iritsi da. Ikusleak sei pantaila erraldoien inguruan bildu dira eta Athleticen jokoaz gozatu dute. Berdinketa baino gehiago merezi izan dute Sevillan.

Laburbilduz, 125. urteurrenaren estreinaldia erraldoia. Gogoan geratuko den egun bat. Afizioa eta Athletic Club elkartuta. Zorionak Athletic eta zorionak athleticzale guztiei.