Alex Txikonek Cadiz CF-ren aurkako partidan ohorezko sakea egingo du

Ostiral honetan, Cadiz CF-ren aurkako partida hasi aurretik, Katedralak Alex Txikonen ohorezko sakea biziko du. Horrela, Athletic Clubek alpinista bizkaitarra omendu nahi du, munduko zortzigarren tontorrik garaiena den Manaslu mendia (8.163 metro) oxigeno artifizialaren laguntzarik gabe igotzea lortzeagatik.

41 urteko alpinista Lemoarra historiako lehena izan da, neguko espedizio batean eta oxigeno artifizialik gabe, zortzimila metro gorako mendate hau koroatzea lortu duena. Aurretik, birritan saiatu zen balentria hau gauzatzen, 2021ean eta 2022an, eta hirugarrenean gailurrera egitea erdietsi du.

Txikonek zortzimilakoekin duen esperientzia 21 urterekin hasi zen, Broad Peak igo zuenean. Ordutik, 30 espedizio baino gehiagoko kide izan da eta 14 zortzimilakoetatik 11tan egin du gailurra, Shishapagma bi aldiz eskalatu duelarik. Beraz, guztira, hamabi igoera gauzatu ditu. Azken hamarkadan neguko espedizioak Himalaya inguruko mendietan zentratu ditu. Hain zuzen ere, 2011ko negutik proiektu horiek etengabe zuzentzen dituen munduko alpinista bakarra da Txikon.