Jokin Altuna, otsaileko enbaxadorea 125. urteurrenean

Jokin Altuna, otsaileko enbaxadorea 125. urteurrenean

Pilotari gipuzkoarra, 26 urterekin sei txapel dituena, txikitatik da Athletic Cluben jarraitzaile sutsua

Txapeldunetik txapeldunera. Jokin Altuna pilotari gipuzkoarrak Jon Rahmen lekukoa hartu du Athletic Cluben 125. urteurreneko enbaxadore gisa, eta hala izango da otsaila osoan zehar. Altunak gure balore guztiak ordezkatzen ditu: umiltasuna, ahalegina eta irabazteko grina. 26 urterekin sei txapela ditu jada Amezketako kirolariak, den denak Bizkaia Pilotalekuan jantzitakoak. Hiru lehiaketa handiak irabazi dituen zortzi pilotarietako bat da, bereak baitira Buruz burukoa, Lau T'erdikoa eta Binakakoa.

Athleticen jarraitzailea da txikitatik, bere osabak kamiseta zuri-gorria oparitu zionetik. Bere lehen partida San Mamesen 2009an izan zen, zelai zaharrean, eta gerora askoz gehiago etorri dira.

 Altunak bere aita Joaquinekin bisitatu du Ibaigane, eta bertan Jon Uriarte presidentearekin eta Jose Angel Iribar handiarekin egon dira, 125. urteurreneko intsigniak hartzeko.

"Ohorea da niretzat, txikitatik izugarri gustatu izan zait Athletic. Ez nuen halakorik espero. Ez da aukeratzen duzun zerbait, sentitzen duzuna baizik. Asko gustatzen zait futbola nola bizi den hemen, taldearen eta afizioaren arteko lotura horrek txunditzen nau", azaldu du Altunak. 2017an Ohorezko Sakea egin zuen amezketarrak Athletic-Real Madrid batean, 21 urterekin, eta 25 beteta beste omenaldi bat jaso zuen palkoan, bere azken garaipen handiaren ondoren.

Jokin Altunak etengabe handitzen ari den izugarrizko garaipenen zerrenda du. 2014an egin zuen debut profesionala, Asperekin, eta 2016an, 20 urte bete berritan, 4 T'erdiko lehen finala jokatu zuen. Lehen txapela 2017an jantzi zuen, Mikel Urrutikoetxearen aurkako 22-21 markagailuarekin bukatu zen partida ahaztezina irabazita. Gerora 2020an eta 2021ean ere irabazi zuen txapelketa hau. Buruz burukoan bi aldiz izan da txapeldun, 2018 eta 2021ean, eta 2022ko apirilean Binakakoa irabazi zuen Martijarekin batera, Unai Laso eta Ander Imaz mendean hartu ondoren.