Bukatu da Athleticen ibilbidea Gazteen Kopan

Athletic Clubek agur esan dio Gazte mailako Kopari Real Madrilen aurkako finalerdian Reino de Leon zelaian galdu ondoren. Lehen zati parekatu eta entretenigarri baten ondoren, talde merengeak bi gol sartu ditu bigarren zatian eta txapelketako lehen finalista bilakatu da.

Partida erritmo altuarekin hasi da eta bi taldeek abaguneak izan dituzte. Real Madridek neurketaren aginte makila eraman du eta Athletic madrildarren edozein akatsen zain egon zen erasora bortitz ateratzeko. Alvaro Arbeloak zuzentzen duen taldeak aurrea hartzeko aukerak izan zituen, baina atzelari eta atezain zuri-gorriak ez diote aukerarik eman. Bittor Llopisen gazteak Real Madriden ate ingurura iritsi dira ere, baina ez dute asmatu jokaldia bukatzeko unean. Bi taldeak berdinduta joan dira aldageletara.

Bigarren berrogeita bost minutuak bikain hasi dira Athleticentzat. Zuri-gorriek aukera onak izan dituzte markagailua irekitzeko eta oso gertu izan dute. Hala ere, Bittor Llopisen taldea unerik gozoenean zegoenean, Real Madrilek aurrea hartu du, 60. minutuan. Nico Pazek Santos gainditu du area barruan jaurtitako ezkerkada gogor batekin. Geldiezina. Athleticek ez dio norgehiagokari aurpegia galdu eta madrildarren atezaina gainditzeko asmoz jarraitu du. Huestamendiak, besteak beste, gertu izan du gola, baina ezin izan du gauzatu. Real Madrilek zorigaiztoko ekintza batekin erabaki du finalerdia, eta Athleticen atzealdeak bere atean sartu du baloia. Zuri-gorri gazteak ondo lehiatu dira, baina ezin izan dute talde merengea gainditu.