"Irabazteko gogoa dugu, baina ez gaude urduri"

Ernesto Valverdek agerraldia egin du bihar 21:00etatik aurrera lehoiek Real Valladoliden aurka Jose Zorrilla futbol zelaian jokatuko duten partidaren atarian, LaLiga astebetez gelditu aurretik nazioarteko neurketak direla eta. Athletic Clubeko entrenatzailearentzat garrantzi handia du hitzorduak, txapelketan dagoen berdintasunagatik: "Lehen bi partidak irabaziz hasi genuen bigarren itzulia, eta azkenekoetan ez dugu lortu, zenbait arrazoiren ondorioz. Biharkoa norgehiagoka garrantzitsua da guretzat, jakina. Funtsezkoa da guretzat, baina ez gaude urduri. Irabazteko gogoa dugu, sailkapeneko goiko aldetik gertu jarraitu nahi dugulako. Garaipenak lortu gabe posizio batean trabatzen ari gara. Besteek ere ez dute asko batzen eta dena konprimitzen ari da. Gauza askotan ondo gaude, baina emaitzak ez dira onak".

Aurkariari dagokionez, etxean duen indarra azpimarratu du teknikari zuri-gorriak: "Talde indartsua da etxean. Gorabeheraren bat izan du denboraldian zehar, baina ondo ikusten ditut. Une onean daude euren etxean, azken bederatzi puntuetatik zazpi egin dituztelako. Erasoari erreparatuz, bizitza zaildu diezazuketen jokalari teknikoak ditu, beti jokatzera ausartzen direnak eta presioa salbatzeko argudioak dituztenak. Aldi berean, zu goian estutzen saiatzen dira. Une honetan, puntuak garrantzitsuak dira guztiontzat".