Honey Thaljieh: "Sekulakoa da Athleticek aukerak ematea"

Honey Thaljiehk (Belen, 1984) Jose Angel Iribarren eskutik jaso zuen joan den igandean San Mamesen Athletic Clubeko enbaxadorearen intsignia bere 125. urteurrenean. Amaiera bikaina eman zion Palestinako futbol selekzioaren sortzaileak Garazi Muruarekin, Honeyrentzat anfitrioirik onena izan zenarekin, partekatu zuen asteburuari. Kapitain batetik bestera, bi emakumeek harremanak estutu zituzten izendapen hau ahalbidetu duten balio partekatuen inguruan. Iribar eta Garazirekin ez ezik, Jon Uriarte presidentearekin, Nerea Ortiz presidenteordearekin eta Ana Diez, Laura Ruiz de Azua, Ainhoa Iza, Goizalde Santamarina eta Garazi Unibaso batzordekideekin ere hitz egiteko aukera izan zuen Honey Thaljiehk. Igande goizean, Emakumeen Nazioarteko Eguna zela eta, Honey Thaljieh eta Garazi Muruak M8ko pankarta eraman zuten Athletic Clubek Valencia FCF-ren aurka Lezaman jokatu zuen emakumezkoen partidaren atarian.

Lehenago Jon Rahm eta Jokin Altuna enbaxadoreek egin zuten bezala, Honey Thaljiehk ere esker oneko mezua helarazi nahi izan zien Klubari eta athleticzaleei: "Ohorea eta plazera da niretzat". Izendapena onartzera bultzatu zuten arrazoiei dagokienez, Honeyk nabarmentzen ditu berak partekatzen dituen Athletic Cluben balio sozialak: "Sekulakoa da Athleticek aukerak ematea, horrek ahalbidetzen baitu pertsonak bizitzan nabarmentzea eta aurrera egitea; aukera izatea".

Gaur egun, Honey Tahljieh Palestinako Gazteriaren eta Kirolaren Kontseilu Nagusiko kidea da, eta FIFAko Komunikazio zuzendaria. Bertan, genero-berdintasunaren, hezkuntzaren eta bakearen aldeko ekimenak lantzen ditu futbolaren bidez. Martxotik aurrera, Athletic Cluben 125. urteurrenaren intsignia ere harro eramango du gainean.