"Futbolarekiko grinak batzen gaitu"
"Futbolarekiko grinak batzen gaitu"
Ia bostehun klubek jaso dute Athletic Cluben 125. urteurrena ospatzeko lamina pertsonalizatua
125 urteko historian zehar Athletic Clubek aurkari izan dituen eta oraindik jardunean dauden klub guztiek opari pertsonalizatua jaso dute talde zuri-gorriaren eskutik.
Oparia 1915ean Jose Arruek margotutako "Equipo del Athletic Club" margolaneko lamina pertsonalizatua da, talde bakoitzarentzat berariaz egindako edizio esklusibo batean oinarrituta. 125. urteurrenaren logotipoaz aparte, Athleticen eta aurkari bakoitzaren ezkutu ofizialak eta esaldi hau jasotzen ditu laminak: "Futbolarekiko grinak batzen gaitu", euskaraz eta oparia jasotzen duen klubaren berezko hizkuntzaren itzulpenarekin.
Guztira 472 lamina bidali dira, 35 hizkuntza ezberdinetan prestatuak, beste horrenbeste klubetara, beti ere horietako bakoitzaren aurka gutxienez partida bat jokatu badugu. Horietako 266 lagunartekoetan izandako aurkariak dira eta 206 lehiaketa ofizialetakoak. Atalei dagokienez, gizonezkoen taldearenak 395 aurkari izan dira, emakumezkoenak 50 eta bien aurkakoak 27.