100 egun Tourra hasteko

100 egun besterik ez dira falta uztailaren 1ean Frantziako Tourreko ‘Grand Départ’ lasterketa San Mamesetik ateratzeko. Athletic Clubek Bilboko Udalarekin, Foru Aldundiarekin eta Christian Prudhomme zuzendaria buru duen Tourreko ordezkaritza batekin batera parte hartu du atzerako kontaketaren hasierako ekitaldian. Arratsaldeko 20:30ak pasata iritsi da segizio instituzionala Katedraleko zabaldegira. Bertan, Jon Uriarte presidenteak eta Iker Muniain eta Garazi Murua Athletic Clubeko kapitainek harrera egin diete. Horiz argiztatutako estadioaren aurrean, Jon Uriartek Christian Prudhommeri eman dio 125. urteurrena ospatzeko maillot zuri-gorria. Bilboko Koral Elkarteko ehun kidek baino gehiagok amaiera eman diote “Maitia, nun zira?” Zuberoako kanta herrikoia abestuz.

Atzerako kontaketaren hasierako ekitaldia arratsaldeko 19:30ean hasia zen udaletxearen ondoan. Juan Mari Aburto Bilboko alkateak, Bingen Zupiria Kultura sailburuak, Elixabete Etxanobe Herri Administrazioko foru diputatuak eta Christian Prudhommek atzerako kontaketako erlojuaren sakagailuari eragin zioten. Une horretan, udaletxea eta Aznar eraikina horiz argiztatu ziren Frantziako Itzuliko maillot bereizgarri batekin. Hortik segizioa San Mamesera abiatu zen, Bizkaiko Foru Aldundiaren jauregian geldialdia eginez, hau ere horiz argiztatua.

Atzera-kontaketaren ospakizunek bihar jarraituko dute Gasteizen, Andre Maria Zuriaren plazan argi eta soinu ikuskizuna egongo dela, eta ostiralean Donostian, non maillot erraldoi bat zabalduko den.