Neskek garaipena nahi dute San Mamesen Sevillaren aurka
Neskek garaipena nahi dute San Mamesen Sevillaren aurka
Gaur, 20:00etan, Athletic Club talde andaluziarraren aurka arituko da Katedralean beharrezkoa duen garaipena lortzeko helburuarekin
Iritsi da eguna. Atzoko azken entseguaren ostean, lehoiak irrikaz daude San Mamesen Sevilla FCren aurka jokatuko duten hitzorduaren zain. F Ligako 23. jardunaldia dugu eta Athletic Clubek garaipenaren bidera itzultzea izango du helburu. Bi porrot jarraian jaso ondoren, Iraia Iturregiren taldeak hiru batu nahi ditu Katedralean bilduko diren milaka zaleen aurrean.
Sevilla FC bederatzigarren postuan dago 30 punturekin. Hamar azpitik, hamargarren postuan, talde zuri-gorria dago. Horrela, hitzordu garrantzitsua da denboraldiko azken txanpa honetan sailkapenean distantziak murrizteko eta gune arriskutsutik lehenbailehen urrundu ahal izateko. Athletic Clubek Reale Arenan jokatuko du datorren astean Realaren aurka, eta etxean geratzen zaizkion bost partidetatik lehena irabazi behar du gaur San Mamesen. Partida horiek, gainera, sailkapenean Athleticen azpitik dauden taldeen aurka izango dira.
Talde andaluziarra dinamika onean sartu da 2023. urte honetan, denboraldiaren lehen zatiko irregulartasuna zuzenduz. Hitzordura Sevillako derbia etxean 3 eta 0 irabazi ondoren helduko dira eta beraz, Cristian Tororen jokalariak ilusioz gainezka datoz Bilbora agertoki paregabe batean jokatzera.