Partida aurrekoa: Athletic Club-CA Osasuna (1/2 Kopa - Itzulikoa)
Partida aurrekoa: Athletic Club-CA Osasuna (1/2 Kopa - Itzulikoa)
San Mamesek lehoien eta gorritxoen arteko finalerdietako itzulikoa erabakiko du
Egun erabakigarria iritsi da. Athletic Club eta CA Osasuna Kopako finalerako txartela izango dute gaur gauean. Gorritxoek abantaila txiki batekin, joaneko 1-0ekoaren ostean, San Mamesek erabakiko du maiatzaren 6an La Cartujan titulua lortzeko hautagai izango den lehen finalista. Katedrala jendez gainezka egongo da, futbol-gau handi baterako irrikaz eta emozio handiko derbia ikusteko prest izango dira. Saria oso mamitsua da bi taldeentzat.
Deialdia
Ernesto Valverdek 23 jokalari sartu ditu CA Osasunaren aurkako zerrendan. Ander Herrera bueltatu da, baina Morcillok eta Lekuek baja izaten jarraituko dute
Valverde
Errepasatu hemen entrenatzaile zuri-gorriak bilbotarren eta nafarren arteko norgehiagokaren aurretik egindako adierazpenak.
Aurkaria
Club Atletico Osasuna 1920ko urriaren 24an sortu zen, eta egun horretan bertan jokatu zuen bere lehen futbol partida. Estatuko lau klub profesional bakarretako bat da, Real Madrid CF, FC Bartzelona eta Athletic Clubekin batera, Kirol Sozietate Anonimo bat ez dena, eta, beraz, klubaren jabetza bazkideek dute.
Txapelketa honetan gorritxoen jardunik onena 2004/05 denboraldian azpitxapelduna izan zenekoa zen. Finala Betisen aurka galdu zuen finalerdietan Atletico Madril mendean hartu ondoren. Sevillaren aurka 1935ean, Barçaren aurka 1936an eta 1988an, eta Recreativo de Huelvaren aurka 2002an jokatutako finalaurrekoen ondoren, bere historiako seigarren finalerdia da hau. Kanporaketa honetara CD Fuentes, CD Arnedo, Nàstic de Tarragona, Real Betis eta Sevilla FC taldeak menderatu ondoren iritsi da.
Bizkaitarrek eta nafarrek joaneko eta itzulerako hiru kanporaketa jokatu dituzte Errege Kopako historian zehar, eta azken emaitza beti izan da lehoien aldekoa. Hala ere, kanporaketa honetara arte, bi taldeek ez zituzten inoiz indarrak neurtu KO torneoko finalerdietan.
Estatistikak
Kopako bi taldeen arteko azken kanporaketa, azken honen aurretik, 2008/09 denboraldiko final-zortzirenetan izan zen. Orduko hartan, joaneko norgehiagoka Nafarroako Erresuman jokatu zen, 1-1eko emaitzarekin bukatu zena. Itzulerako partidan zuri-gorriek 2-0 irabazi zuten San Mamesen Gabilondo eta Ion Velezen golekin. 1960/61 denboraldian final-hamaseirenetan izan zuten hitzordua eta, Iruñean 1-0 galdu ondoren, lehoiek kanporaketa gainditu zuten San Mamesen 2-0 irabaziz. Azkenik, 1955/56 denboraldian, joaneko partida San Mamesen jokatu zen 4-1eko aldeko emaitzarekin eta itzulerakoa Sadarren, 2-2 berdindu zuten.
Sadarren jokatutako joanekoan, Osasunak irabazi zuen, baina ez zuen kanporaketa guztiz erabaki. Katedralak erabakiko du nork jokatuko duen maitzaren 6an La Cartujak jasoko duen Kopako finala.
Kopan, Athletic Clubek Osasunari San Mamesen jokatu dituen hiru norgehiagokak irabazi ditu.
Athleticzaleak munduan barrena
Zauden lekuan zaudela, ziurtatu gure Athleticen partida ez galtzeaz.
