"Amaierara arte jarraitu behar dugu LaLigan"

Ernesto Valverde Athleticeko entrenatzaileak agerraldia egin du lehoiek bihar, 16:15etik aurrera, RCD Espanyoli bisita egin aurretik. Hitzordua Kopako finaletik kanpo geratu ondoren heldu zaie eta hori lehenbailehen ahaztu nahi dute: "Kanporatu egin gaituzte eta, normala denez, inori ez zaio gustatzen Kopa bezalako lehiaketa batetik kanpo geratzea hor geundenean. Partida bat dugu bihar eta ez gara egunero zulo batean sartuta egongo. Hori pasatu da eta amaierara arte jarraitu behar dugu LaLigan. Bihar da lehen urratsa. Jendeak nahi duena erreakzio bat da, behin partida bat pasatzen denean, beti hurrengoa etortzen delako eta zure mailarik onena eman behar duzulako".

Teknikari zuri-gorriaren ustez, talde perikoaren aurkako neurketa garrantzitsua da bi arrazoirengatik: "Partida garrantzitsua da puntuazioaren eta altxatzearen ikuspuntutik. Badakigu beharrizan-garaian dagoen eta entrenatzailea aldatu berri duen aurkari bati aurre egingo diogula eta guk maila ona eman behar dugu, orain arte goazen bidetik jarraituz. Horrek ez du aldatu behar. Horrela izango dela uste dut, taldea ondo dagoelako".

Azkenik, Valverde baikor agertu da taldeak datorrenari begira duen jarreraren inguruan, eta ia talde guztiek ezbeharrei aurre egiten jakin behar dutela aitortu du: "Denboraldian zehar, une batzuetan huts egin dugu eta azkar altxatu gara. Kanporatuta geratzea talde gehienei gertatzen zaie, lehiaketa guztietan, finalera iristen ez direnean".