"Bilbon ilusio handiz bizi da Kopa, eta izugarria litzateke irabaztea"

Iraia Iturregi Athletic Clubeko entrenatzaileak eta Ane Azkona jokalariak prentsaurrekoa eskaini dute Las Rozaseko Futbolaren Hirian, bihar 21:00etan Butarquen Real Madriden aurka jokatuko duten Erreginaren Kopako finalaurrekoaren atarian. Biak bat datoz talde zuriari faboritoaren papera ematerakoan, baina konfiantza dute dituzten arrakasta-aukeren aurrean.

"Jakina, lauko finalaren barruan dauden aurkarien artean Real Madrid dela faborito nagusia, ligan erakutsi duenagatik soilik, baina horrelako txapelketa batean, partida bakarreko kanporaketekin, ehunekoak apur bat gehiago berdintzen dira. Real Madridek internazionalez betetako taldea du, baina konfiantza osoa dut nire jokalariengan, eta ilusio handiz gatoz klubaren beira-arasetan lehen Kopa jartzeko. Aldagela alai eta ilusioz betea ikusten dut. Oso indartsu gaude, ligan gorabeherak izan ditugu, baina denboraldia sentsazio onekin amaitu dugu eta denboraldiko unerik onenean iritsi garela uste dut, bai zelai barruan eta baita kanpoan ere", adierazi du Iraiak.

Gainera, Loiuko entrenatzaileak txapelketa hau oso berezia dela aitortu du: "Jokalari bezala ligako tituluak ospatzeko zortea izan dut, baina kopako finaletara ere iritsi naiz eta ezin izan dut irabazi. Bilbon ilusio handiz bizi da Kopa. Mutilekin azken aldian finaletara iristeko aukera izan dugu eta ez dugu lortu. Hala ere, bada oso positiboa eta baikorra den zerbait; gure filosofiarekin lehiakorrak izaten jarraitzen dugu eta tituluak lortzeko borrokan gaude. Lezaman egiten den eta jende askok parte hartzen duen harrobiko lan bikainaren saria izango litzateke, eta urtez urte bere fideltasuna erakusten duen zalegoa ere saritu nahi dugu. Izugarria litzateke haiei Kopa eskaintzea".

"Min egin diezaiekegu"

Bestalde, Azkonak taldea garaikurra irabazteko gai ikusten duela esan du: "Jokalari gazte asko ditugu eta taldea ilusioz gainezka dago. Horri eguneroko lana gehitzen bazaio, Real Madridi aurre egiteko eta finalean plaza bat lortzeko aukera asko ditugula uste dut. Egia da faboritoak Real Madrid eta Atletico direla, baina guretzat hori aukera bat da, eta uste dut min egiteko nahikoa arma badugula, eta ez gaitu gogaitzen faborito ez izateak. Ordutegia onena ez izan arren, harmailetan babesa izango dugu Kopa lortzeko".