Mondragon Unibertsitatearekin akordioa goi mailako ikasketak egiteko
Mondragon Unibertsitatearekin akordioa goi mailako ikasketak egiteko
Unibertsitateko ikasketak edo goi-mailako heziketa-zikloak egiteko malgutasun-baldintza zehatzak dituzten futbolari guztientzat zabaldu da eskaintza
Mondragon Unibertsitateak eta Athletic Clubek lankidetza-hitzarmena sinatu dute Euskal Herriko kirol profesionala eta goi-mailako hezkuntza lotzeko. Izan ere, bi erakundeek hitzarmen bat sinatu dute Athletic Clubeko jokalariek goi mailako ikasketak egin ditzaten aukerak bultzatu eta errazteko, unibertsitatekoak zein goi mailako heziketa zikloetakoak. Akordio horren barruko lehenengo ekintza gaur arratsaldean bertan izango da, Unibertsitateak eskaintzen dituen titulazioak Klubeko jokalariei aurkezteko.
Akordioa Ibaigane Jauregian sinatu dute Vicente Atxa Mondragon Unibertsitateko errektoreak eta Jon Berasategi Athletic Clubeko zuzendari nagusiak. Bertan izan dira Idoia Peñacoba unibertsitate horretako idazkari nagusia eta David Rincon eta Mikel Garcia, Lezamako ordezkariak Jokalariaren Arreta Sailan.
Akordio honi esker, Mondragon Unibertsitateak, errendimendu handiko kirolari gisa akreditatutako ikasleei emandako tratamendu baliokidea aplikatuko die, edozein titulaziotan matrikulatutako Athletic Clubeko ikasle kirolariei. Ikasle horien baldintzak eta eskubideak, fakultateetako araudi akademikoetan jasotzen dira. Hain zuzen ere, ikasle horiek guztiek malgutasun handiagoa izango dute, esaterako, eskoletarako nahitaezko asistentzian, ECTS kopuruan eta matrikulatu beharreko ikasgaietan, azterketen egutegian eta praktika eta gradu-amaierako proiektuei eskaini behar zaien denboran.
Horrez gain, futbolarekin lotutako eremuetan edo interes komuneko eremuetan ikerketa-proiektuak sustatzeko aukera aztertuko dute bi alderdiek. Eta beharrezkotzat jotzen bada, Athletic Clubeko profesionalentzako prestakuntza-programak eskaintzeko aukera aztertuko dute.
Hasiera batean, akordioak hiru futbol-denboraldi iraungo ditu, 2025/26 denboraldira arte, eta urtero luzatu ahal izango da denboraldi baterako.
Vicente Atxa: "Mondragon Unibertsitatearen eskaintza Bilbon handitzeak eta Bizkaian dugun presentzia handiagoak aukera ematen digute lurraldeko beste eragile batzuekin estuago lankidetzan aritzeko, pertsonen prestakuntza integralaren bidez gizartea eraldatzen jarraitzeko. Kasu honetan, Athletic Clubekiko lankidetzak gure unibertsitate-komunitatean sartzea eta goi-mailako ikasketak egitea eskaintzen die bere jokalariei, unibertsitatekoak edo lanbide-heziketakoak izan".
Jon Berasategi: “Mondragon Unibertsitatearen izen handiko entitatean gure futbolariek izango duten ikasketa-eskaintza zabaltzea aurrerapauso handia da haien prestakuntza akademikoan. Athletic Cluben garapen pertsonala eta futbolaren garapena lehenesten ditugu eta akordio honek horretan laguntzen digu”.
Mondragon Unibertsitatea izaera kooperatiboko unibertsitatea da, ekimen eta bokazio sozialekoa, onura publikokoa eta irabazi asmorik gabekoa, MONDRAGON Korporazioko kidea. Bere eginkizun nagusia eraldaketa soziala da, pertsonen prestakuntza osoaren eta ezagutzaren sorreraren eta transferentziaren bidez. 1997an sortu zen, nahiz eta berau osatzen duten fakultateek askoz ere ibilbide luzeagoa izan, eta 2023an 25. urteurrena ospatzen ari da. Horren bidez, amets kooperatibo hori ahalbidetu duten pertsona guztien lana balioetsi du.