Nekane Diez: “Lezamako etorkizuna ziurtatuta dago, talentua eztabaidaezina da”

Nekane Diez: “Lezamako etorkizuna ziurtatuta dago, talentua eztabaidaezina da”

Klubean 16 denboraldi eman ondoren, aurrelariak agur esan du gaur San Mamesen, hunkituta eta bere kide guztiez inguratuta: "Denbora azkar pasatzen da eta zuek zarete aukeratuak. Aprobetxa ezazue aukera, esku onenetan zaude"

Nekane Diez San Mameseko prentsa aretoan agertu da, ikasturtea amaitzean futbola utziko duela iragarri ostean. Athleticen 16 denboraldi, 381 partida eta 162 gol egin ostean, aurrelariak, Athletic Cluben bere futbol-ibilbide osoa egin duenak, hunkituta esan du agur bere kide guztiez eta talde teknikoaz inguratuta: "Amets hau inoiz bukatzea gustatuko litzaidake, elkarrekin partekatu ditugun pozak berriz ospatu, baina etapa berri bati ekiteko garaia iritsi da. Eskurik onenetan zaudete, aprobetxa ezazue, denbora azkar pasatzen da eta zuek zarete aukeratuak". 

Diezek dena nola hasi zen gogoratu du: "Bidaia hau ahaztezina izan da. Gogoan dut, bederatzi urte genituenean, aitak anaia eta biok San Mames zaharrera ekarri gintuela, emakumezkoen taldea ikustera. Lehen aldiz jokatzen zuten zelai honetan eta Ligako lehen titulua irabazteko aukera zuten. Nire ametsik onenetan ere ez nuen pentsatuko gaur harro esan nezakeenik familia zuri-gorri honetako kide izan naizela, 381 partida jokatu ditudala eta 162 gol sartu eta ospatu ahal izan ditudal". 

Esker oneko hitzak ere izan ditu Iñigo Juaristirentzat, berak deitu baitzion 2007an, 15 urte zituela, emakumeen egituran parte hartzeko: "Neska hark bere ametsa betetzeko lehen urratsa eman zuen. Oraindik gogoan dut nire gurasoen aurpegia, bere bizitzako eta, beharbada, nirearen erabaki garrantzitsuenetako bat hartu behar zutela konturatu zirenean.15 urteko alabak etxetik irten behar zuen". 

Nekanek onartu du lesioek min egin diotela azken denboraldietan eta, neurri batean, faktore erabakigarria izan direla agur esateko. Hala eta guztiz ere, aurrelariak pozik dio agur: "Aro hau dena eman izanaren lasaitasunarekin itxiko dut. Negar egin dut, ikasi dut, asmatu dut, huts egin dut eta pertsina gisa hazi egin naiz. Hustu egin naiz". 

Diezek baikor begiratzen dio etorkizunari: "Lezaman daukagun talentua eztabaidaezina da eta etorkizuna ziurtatuta dago. Ea beste jokalari askok ere nik egin dudan bezala 16 denboraldiz Athleticez gozatzen badute. Horrek esan nahi du gai izan direla hau Athletice zer den benetan sentitzeko, kolore hauek defendatzeko eta jakiteko ezin duzula beste kamiseta bat jantzi, ezta talde honi gol bat sartu ere". 

“Nekane One Club Woman eztabaidaezina da”

Jon Uriartek, Athletic Clubeko presidenteak, Mikel Gonzalez futbol zuzendariarekin eta Xabier Arrieta emakumezkoen futbol zuzendariarekin batera, Nekaneren irudia goraipatu du: "Zenbaki izugarriak dituen jokalaria da, One Club Woman eztabaidaezina. Liderra da zelai barruan eta kanpoan, erreferente bat guztiontzat. Eskerrik asko, Nekane!".