Carlos Gurpeguik Bilbao Athletic entrenatuko du

Carlos Gurpegui izango da Bilbao Athleticeko entrenatzailea datorren denboraldian. Andosillako ikonoa Basconiako entrenatzailea izan da azken bi denboraldietan, eta bertako jokalari askok osatuko dute bigarren taldea. Bi denboraldietan igoera fasera gidatu du Basauriko talde historikoa. Talde teknikoa laster ezagutuko da.

Lehen taldean 393 partida jokatu ondoren, Gurpegui talde teknikoan sartu zen lehen taldeko laguntzaile gisa, eta Klubeko arduradun instituzional nagusi izan ondoren, harrobiko futbolarien hobekuntza indibiduala lantzen aritu zen. Aurreko denboraldian, Bilbao Athleticen bigarren entrenatzaile gisa hasi zen Imanol de la Sotarekin batera eta denboraldiaren erdialdean Basconia zuzentzera igaro zen. Egungo ikasturtean, Basauriko klubeko lehen entrenatzaile gisa errepikatu du, ligako laugarren amaitu eta igoerako play offean galdu zuen SD Leioaren aurka.

"Oso erronka polita da, ilusio eta gogo handiz egiten diot aurre Klubak ematen didan aukerari. Baskonian daramadan urte eta erdiagatik ia jokalari guztiak ezagutzeko abantaila daukat, eta denboraldi bikaina egiteko itxaropena ere bai", adierazi du nafarrak.

"Lezamako entrenatzaile orok erantzukizun handia du Klubarekin, jokalariekin eta are gehiago daukagun filosofiarekin. Denok gara oso garrantzitsuak, hemen gauden guztion helburu nagusia lehen taldea baldintza onenetan, maila gorenean, iristen diren jokalariez elikatzea da, bai kirol mailan bai maila intelektualean, eta denok argi izan behar dugu hori", argudiatu du.

Bestalde, Mikel Gonzalez Futbol zuzendariak apustuaren arrazoia azaldu du: "Gure ustez, Klubaren interesetarako eta asmoen barruko prozesu naturalerako erabakirik onena da. Carlos Gurpeguik hainbat urte daramatza Lezaman lanean arlo ezberdinetan, lehenik jokalariarekin bakarka lan egiten eta gero entrenatzaile gisa. Ondo baino hobeto ezagutzen du taldea eta lehen taldeko entrenatzailearekiko harremana bikaina da. Ernesto Valverderen jokoarekin antz handiena duen etxeko entrenatzailea da, eta horrek pisu handia izan du erabakian".