Maite Zubietak 2025era arte berritu du

Athletic Clubek eta Maite Zubietak (atzo bete zituen 19 urte) akordioa itxi dute futbolariaren kontratua bi denboraldiz luzatzeko, 2025eko ekainaren 30era arte. Erdilaria 2018-19 denboraldian iritsi zen Lezamara kadete mailan jokatzeko eta iragan denboraldian jokatu zituen lehen minutuak lehen taldearekin. Hurrengo ikasturtean lehen talde zuri-gorriaren dinamikan sartuko da osotasunean.

Zubieta, atzelari zein erdilari gisa aritu daitekeena, ezinbesteko jokalaria izan da emakumezkoen filialaren hazkundean Klubera iritsi zenetik eta joan den abenduaren 3an lehoi bezala debuta egin zuen Lezaman Madril CFFren aurka. Ikasturte honetan, 1ª RFEF mailan 14 partida jokatu ditu eta Iraia Iturregiren agindupean Liga F-n 16 neurketa eta Erreginaren Kopako bi norgehiagotan lehiatu da. Gainera, 2022-23 denboraldia gazte zuri-gorriarentzat oroimenezkoa izango da, bi urrezko domin lortu baitzituen Espainiako selekzioarekin joan den udan, 19 urtez azpiko Europako Txapelketan eta 20 urtez azpiko Munduko Txapelketan.

Ibaigane Jauregian sinatu zuen ekitaldian, Jon Uriarte presidentea eta Xabi Arrieta emakumezkoen taldeen kirol-zuzendaria izan zituen lagun. Busturiakoak esan duenez, "Athletic Clubeko lehen taldean jokatzea eta Lehen Mailan debuta egitea beti izan da nire ametsa". Maitek ilusio handia agertu du hasteke dagoen denboraldi berriarekin, lehoi moduan "esperientzia eta minutu gehiago" eskuratu nahi du.